International Women's Day ah muidawh mintami AnnaLynne McCord nih a luan cia a tuanbia vialte a phuan dih. BBC ah a hawipa nih a rak tlaihhremnak kong le holh lo tein a rak umnak le zeihmanh a tong lo bantukin a rak i umternak vialte cu a phuan dih. A rak ka tlaihhrem ahhin zeihmanh ka rak tuah lo a ti.
Kum hra chung vialte ka rak doh lomi le daidep ka rak ummi vialte ka ruah lengmang ah hin keimah le keimah tiang ah thah hmanh ka ngamh. Ka rak doh awk a si. Atu ahhin keimah le keimah lawng te kaa mawhchiat tiah a chim. Tutan lawng ah a tuanbia a chim lo. 2014 zong ah a rak chim cang.
A chimmi cu 'night club ah ka rak kal hnawh i, a hawile vialte sinah kan i duh tiah a rak chimh cang. Ka theih cu ka khuaruahhar i ka thinhung tuk. A ka chimh thanmi cu biaruahnak kan duh a ka ti. Na tuahmi kha na thei ko lo maw ka ti i a ka lehmi cu zeidah na chim a kan ti i, mah zan kan tuahmi kha a nuam ko lo maw' a ka ti tiah a chim.
AnnaLynne nih a chimmi cu 'Pastor fanu ka si i kum 15 ka si in inn ka chuah tak. Ningcang lo deuh in ka rak nung ve. Kan rak lam i kan rak i zuam hna. Kan duh ning in ka tlawngleng hna. Asinain tlaihhrem ka tong bal lo. Asinain ka inn cia ah ka hawipa a ra i caan tha lak in a ka tlaihhrem' tiah a chim.
International Women Day ah BBC news nih bia an hal i, a phuan dih than. A chim thanmi cu a ka tlaihhrem ah hin ka lung a rak rawk tuk. Asinain ahohmanh nih an ka thei lo tiin dai tein kaa um pi. Kaa nun pi chih khawh ko lai tiah ka rak ruah. Asinain ka nunnak hi muihnak in a khat i mah le mah thahnak tiang in ka rak ruat. Ka ban zong keimah le keimah kaa at len hna i keimah le keimah harsatnak ka rak i pe len a ti.
Atu cun minung fir hmang pawl kut in harsatnak a tongmi hna bawmhnak le nu hna covo kongah fak piin rian a tuan cang. Keimah bantukin a tuar i namnehmi nu hna caah ka dir cang lai. Nun duhdimnak an hmuh cio khawhnak hnga kaa zuam lai a ti. Ref: The mirror & BBC News.