March 16, 2017 ah US State Department nih Russian sungthoh pahnih le lunghrinhmi pahnih cungah sualphawtnak bia an chim cang. 2013 le 2014 ah US Yahoo compmay e-mail an rak hack i pumpak email million an rak onpiak hna i an konglam (information) an rak firpiak hna.
An hackmi chungah ralkap upa lei zong an i tel, bank lei zong an i tel i, a dangdang company lianlian zong an i tel hna. 2014 lioah cun Yahoo company nih a rak chimmi cu 'a thlithup in minung 26 account an onpiak hna' tiah a rak chim, asinain a hnuah cun an rak tam tuk.
Ahodah an si tiah an hlat lengmang hna i, nizan ceo in US State Department nih fiang tein an vun phuan cang. Yahoo hack nak aa telmi cu Russian Federal Security Service (FSB) pahnih le a bawmtu hna pahnih an si. Cu chungah Alexsey Alexseyevich Belan 29 hi aa telmi a si i, Russia ah a ummi a si.
State Department nih an phuan thaizing ah Russia leiin Dmitry Peskov nih 'Russian offiice a siah FSB a siah Yahoo hack nak ah kan i tel lo an ti. Asinain U.S. Assistant Attorney General Mary McCord nih a chimmi cu 'thlithup in Yahoo e-mail a ong i, ralkap, pumpak le company konglam (information) a firtu ah FSB le bawmtu pahnih an i tel ko tiah a chim.
A chim thanmi cu 'FSB offiicer pahnih cu 'Dmitry Dokuchaev le Igor Sushchin an si i, Russian cozah nih runvenmi, hruaimi, bawmhmi an si' a ti. A chim thanmi cu bawmtu hna misual pahnih bawmhnak in Yahoo company e-mail an on i, US le a dang kan e-mail a kan luh hnawh' tiah a chim.
A chim thanmi cu 'Russian cozah le US cozah official le journalist le bank le ralkap lei upa hna e-mail an ral khun hna. Nihnihni ah minung pakhat Karim Baratov cu Canada ah kan tlaih cang tiah a chim chih. Ref: VOA News.