Syrian nuclear sernak tuanvo ngeitu aho dah a si? Mossad nih zeitin dah an tuah than lai? Hi vialte tuanvo a rak latu cu Syrian General Mohammed Sulaman a rak si. Israel a hua taktakmi zong a si i, Syria ah bochan taktakmi ralbawi lian pakhat zong a si. President Assad ruahnak petu zong a si i, Assad nih a orhlei kut bantukin a hmanmi a si.
Cu hlan vialte Mossad nih Syrian nuclear hmun an rak theih khawh lonak vialte cu Sulameh ruangah hin a rak si. Israel nih an nuclear hmun an kahpiak han hnu zongah ngol aa tim lo. A hram in thok than a timh kha Israel sungthoh nih an theih than. Israel nih an cawnpiak cangmi hna kha rak cohlan ding a rak si. Asinain ngol a tim hlei lo. Israel nih an ruahmi cu Mohammed Sulameh nih tuanvo a tlaih chung paoh cu Israel kan him lai lo timi an theih. Israel nih lam dang an ngei lo; kan thah a hau ko an ti.
Israeli ralkap nih hlawhtling taktak in an thih-nunnak tluk in a tihnungmi Syria nuclear hmun (reactor) pi cu an hrawh dih cang. Asinain Syrian General Mohammed Sulaman a nunchung paoh cu Israel a him ding an si lo. An hloh than a hau. Asinain thise ram i, an nuclear hmun an kahmi naak in Sulaman thah hi a let in a har deuh ding a si than. Syrian General Sulaman cu aa ralring tukmi a si. A cawlcangh zong a thlithup taktak in a cawlcangmi a si i, thuhnawhmi le runvenmi taktakmi General pakhat zong a si.
Syrian riantuantu upa tlawmpal taktak te lawng nih an theihmi a si. Ralkap nih tha tuk in an cawngh i, an runven rihmi a si. Israeli nih an kut va thlak awk a tha lomi hmun ah a um. August 2, 2008 ah Syria i, rili kam ah a ummi Tartous i a pahnihnak inn villa ah caan a hmang lai timi Mossad nih an theih khawh cang. An thah taktak ding a si ahcun hi hmun hi an caan tha bik a si. Congtu le hnuzultu tampi a ngeih lo karlak caan zong a si. Cun cunglei in kah awk a tha ti lo. Mossad chungin Kidon Division chung minung an thim than hna.
Thlithup mi thah ah a thiam taktakmi zong an si i, training tha taktak a ngeimi zong an si. An ral hna lak hmanh ah hawihleikhun in a thiammi ah an ruah hna i, an upat taktakmi hna an si. Khawika hmun a si hmanh ah Israel ral a simi paoh cu an dawi hna i, a va that lengmang tu hna an si. Cuticun Kidon nih Sulaman inn cu tha tein an lehla dih hmasa. An theihmi cu lam in tha tuk in an congh i, rili leikam in cun congtu an um lo. Rili kam leiah a ummi a innleng kau pi ah hawileng tampi he party a ngei lai timi an theih.
Mossad nih rili cung in a minung rak thlah hna i, tilawng (boat) cung in sniper meithal in rak kah ding in an timh. Asinain tilawng cung in sniper in hmakhat te ah thi lak in rak kah cu a har deuh i, tihnung zong a nung deuh tiah an ruah. A donghnak ah bia an tlukmi cu rili kam tiang rak ratter hna kha a tha bik ti a si. Cuticun Tartous rili kam ah cun tilawng cun an rak ra i, rili kam in meng khat hrawng aa duh khin tiliohnak thuam hruk in ti tang in an rak ra. A inn kam rili tlang kam ah cun an rak phan.
Cu caan ah cun General Sulaman zong a inn a rak phan ve. Duhsah tein nika a vun tlak thluahmah tikah sniper minung pahnih zong ti chung in an vun chuak ve. Sulaman hawileng hna cu rili kam lei i, inn tual kau pi ahcun an rak khat dih cang. Caan zeimawzat a vun rauh hnuah Sulaman zong a vun lang. A chungkhar he a hawilei he zaanriah einak cabuai ah cun an thu hna. Sulaman nih a hawileng a conglawmh cuahmah chung hna ah sniper hna cu zong an rak i tim cuahmah ve.
An kuanfang thlah ding lawng a tang cang. Asinain an target an phenhpiak lengmang hna. Hmun dang ah an i mer than i, Sulaman cu an zoh than. Cuticun an target cu an i tinh. An khuanfang thlah aa ruan khawhnak ding ah electronic device an hman i, cu nih cun aa ruang tein an thlah khawhnak hnga a relpiak hna. An kuanfang cu an vun thlah veve. Sulaman cu mipi lakah cun ruah lo piin a vun tlu colh. Sniper zong an zam colh ve. Mah zanlei cun Sulaman nunnnak zong a dong i, Syria nuclear chunmang zong a dong. Israel lei cun teinak kut an rak bengh i, Syrian lei cun mitthli a rak thla.
Syria nuclear reactor an hrawhpiak hna bantukin General Sulaman an thahnak kongah Israel nih kanmah kan si tiah an thanh duh lo. Ram lengah Israel nih hi bantuk mission an tuan tikah zapi theih in chimphuan an hmang lo, zeicatiah an phung he aa kalh. Asinain hi bantuk thil an tuah tik, a hleiin Sulaman an thahnak kong ti bantuk ah an chimmi cu ‘a very happy accidence’[36] tiah an auh tiah expert jornalist Nate Thayer nih a chim. ‘A taktak ti ah cun hihi an official biachim a si’ tiah a nolh rih.
Israel nih Syrian nuclear program an hrawhpiak khawhmi hna cu hlawhtlin taktak a si. A hrawktu ding ah an hmanmi hna cu special elite unit pathum hna an si. Sayeret Matkal commando nih Syrian nuclear inn ah information an lak, Israeli Air Force (IAF) 69 Squadron F-15Is, F-16Is nih cunglei in an kahpiak hna, cun Kidon nih Syrian nuclear mastermind Sulaman an thah. Syrian nuclear chunmang a tlau dih! Israel caah cun hnangam tuk a si cang. An mitkuh a thaw kho than cang.
======= Dih!=======