Iraq ralkap le an hawile nih ISIS an kah ning a fak chin lengmang cang. Mosul mipi hrimhrim an zam chin lengmang cang. Kuan le bom cu ruahsur in a sur cang. Mipi a zammi zong ISIS nih an kah hna; ISIS zong cunglei he tanglei he an phomh hna. Mipi zong an thi ngaingai cang hna.
Mosul in chaklei camp ah a zammi Mariam Hassan nih a chimmi cu 'miakpi le kuan le bom cu ruahsur in a sur. Thawngpang hi khuari thawng bantukin a tur in an tur. Inn leng chuah ngam hmanh a si lo. ISIS le Iraq ralkap biatak tein an i kah hrimhrim ahcun kan thinphang kho tuk i, thuhnawh lawng te kan rian hna a ti.
Mosul Khua Mi Dirhmun
Mosul mipi zong a zam khomi paoh cu camp ah an zam cio hna. ISIS zong an sungh chin lengmang cang tikah mi sawhsawh bantukin camp ah an rak lut ve hna tiah Iraq ralbawi Ali Hussein nih a chim. ID deu he an rak lut maw lut lo timi zong tha tein kan zoh hna tiah a chim chih.
Atu lio Mosul dirhmun cu a chia ngai. Camp um pawl nih an chimmi cu si, rawl, ti le mei kongah kan thlacham lengmang, asinain raltuknak hmun kan ummi naak cun a let in a nuam deuh thiamthiam ko an ti. Mosul mipi tam biknak hmun ah an i phomh cang hna i, ni fatin in ralzam an tam chin lengmang cang. Ref: VOA News.