Naite ah sungthoh lei nih thawngpang an theihmi cu Al-Qaida tapung le an hawile pawl nih phundang tein bom ser ning le thuh ning an hman cang an ti. Battery, computer le electronic device chungah a puak khomi an chiah cang tiah US Official nih an chim.
US nih cun ralrin kan lak a hau cang tiah US rak luh tikah ken lo dingmi cazin an vun tar colh. Tlawmpal ah UK nih cun an vun tuah colh ve, asinain an khammi ram chungah aa khatmi lakah aa dangmi zong an um ve. UK nih cun ram ruk a thim hna. Cu chungah Tunisia le Lebanon aa tel.
US ahcun an i tel lo. Cellphone naak in a ngan deuhmi electronic device paoh cu kenter hna lo ding tiah ram hnih nih an kham. An khammi hna hi Middle East le Africa ram an si. US nih cun ram riat a thim hna i, cellphone naak in a ngan deuhmi electronic device poah cu citmi vanlawng chungah luh pi khawh a si lai an ti.
Asinain thil phorhnak vanlawng chungah chiah an si lai a ti. Airport 10 chungin an si lai i, nikhat ah vanlawng 50 lengmang nih zulh an si lai. A hleiin Muslim ram an si lai; Dubai le Istanbul zong aa tel lai. US official nih an chimmi cu 'tapung nih cu bantuk electronic device hmang in mipi citmi vanlawng doh an timh' tiah sungthoh lei nih an chim an ti.
Febuary 2016 ah Somalia in a rak zuangmi vanlawng ah minung pakhat nih laptop chungin bom a rak puah asinain vanthat ah an rak thah khawh. Vanlawng zong him tein a tum kho. US nih a khammi ram hna cu: Cairo, Egypt; Dubai, Abu Dhabi, UAE; Istanbul, Turkey; Doha, Qatar; Amman, Jordan; Kuwait City; Casablanca, Morocco; Jeddah, Riyadh, le Saudi Arabia hna an si.
Airline company pawl hna cu: Egyptair, Emirates Airline, Etihad Airways, Kuwait Airways, Qatar Airways, Royal Air Maroc, Royal Jordanian Airlines, Saudi Arabian Airlines and Turkish Airlines hna an si. Cheukhat company nih cun an zulh thluahmah cang. Nirukni in thok a si cang lai. Ref: CNN.