Bawlung chuih minthang thing a simi David Beckham hmai cu zoh ngam zong a si ti lo. Hngakchia hna nih cun an hmuh cangka in an tih i zoh nolh an duh ti lo. Muidawh, style bakmi, bawlung chuih thiam bakmi David Beckham nih zeiruangah dah tihnung in a hmai aa hrawh dih?
Cheukhat nih cun voikhat zohnak in David Beckham a si zong an thei ti lai lo. A cal kam in a hnakhaw cung tiang, cun a keh lei mit hrawnghrang vialte hmapel in an khat dih. A ha zong rawpcak dih cikcek in aa tuah hna. A muidawhnak vialte cu an tlau dih cikcek.
Atu hi Siangpahrang Arthur film an i zeih cuahmah lio a si i. David Beckham cu Arthur ralkap pakhat dirhmun in aa zeih ve. Lung cungah aa bunhmi vainam a phawi kho lomi ralkap (Knight) pa ai ah aa zeih. An i zeihmi film hi minthang taktak a simi Siangpahrang Arthur Cabuaipum (Roundtable) kong a si.
A hmanthlak le an i zeihmi kong a thli tein a rak chuakmi a si. Zei tiang dah an i lim cang timi zong a fiang rih lo. Mipi nih cun an i ngeih taktakmi film a si i, a chuah lai an hngak kho cio ti hna lo.
Beckham nih a chimmi cu 'a fawi lo. Thiam zong a hau, sikaan zong a hau, kan i zeihmi konglam tlawmpal tel thiam lo le theih hmasa lo cun kaa cuh tuk ngam lo. Tampi cawn ka hau rih' tiah a chim. Ref: The sun.
(Note: Luther Tin Hre nih "Siangpahrang Arthur" tuanbia a lehmi a rel cangmi nih cun Siangpahrang Arthur tuanbia le a Knight konglam tampi nan theih cang lai. Tuanbia chan ciam lo tiah mirang nih cun an ruah pengmi a si).