An ram runvennak missile in kan vanlawng an kan kah than ahcun kan hrawhpiak dih cikcek cang hna lai tiah Israel Defence Minister Avigdor Liberman nih Syria a hro cang hna. Nilini zantim ah Israel raltuknak vanlawng nih Hezbollah tapung sinah an kuat dingmi hriamnam cu an phomhpiak hna.
Asinain Syrian ralkap nih missile in Israel raltuknak vanlawng an rak kah ve hna. Syrian lei nih cun Israel vanlawng pakhat kan thlak an ti. Asinain Israel lei nih cun 'a hmaan lo' an ti. Liberman nih fak ngaiin a chimmi cu 'tapung sinah hriamnam an pekmi paoh cu kan ngaan lai lo' a ti.
'Kan phomh lengmang hna lai. Cun Syria nih a missile a hman than ahcun an ram runvennak missile system vialte kan hrawh dih cang lai. A voihnih ruahnak caan kan pe ti hna lai lo a ti. Tapung sinah hriamnam an pekmi hi kan cohlan khawh lomi a si a ti.
Nilini zantim an kahmi kongah Israel ambassador cu Russia nih an auh colh ve. Zeiruangah dah nan kah hna timi fianternak rak tuah an ti. Russia hi Syria bawmtu zungzal a si. Fak deuh in Israel nih Syrian a kah than ahcun Russia nih fak deuh in dan a tat ve men te lai.
Asinain kan ram himnak caah ral a si ko timi cu a zoh sawhsawh ve hna lai lo. Hezbollah tapung hi Iran zong nih an bawmh hna i, Syria zong nih an bawmhmi hna an si. Israel nih an duh lo tukmi le an i ralrin tukmi a si. Ref: CNN.