Nilini zantim ah Syria in Lebanon ah kuat an timhmi hriamnam cu Israel raltuknak vanlawng nih an phomh hna. Ram hnih karlak ah entainak a vun linsa pah. An i hrocer hmanh a daih hlanah zarhpini zantim hrawng ah Israel raltuknak vanlawng nih Syria an phomh than.
Syrian media nih nikhatni ah an chimmi cu Israel raltuknak vanlawng nih Lebanon le Syria ramri hmun zeimawzat an phomh. Hriamnam a phurmi Hezbollah motor le Syrian ralkap hmun an kah chih hna a ti. Zarhpini zing zong ah Israel drone nih Damascus leiah a kal liomi motor an kah a ti.
Lebannese News nih a tial ning ahcun minung pakhat a thi i, Syria van lei runvennak ah an commander a si a ti. Report dang nih cun Assayed hi ralbawl a si lo. Mi sawhsawh a si a ti ve. Israel le Syria karlak ah entainak a linsa chin lengmang cang. 'Syria leiin upa pakhat nih a chimmi cu 'ningani hnu cun kan lentecelh ning aa thleng chin lengmang cang lai' a ti.
US ah ambassador an thlahmi Syrian Bashar al-Jaafari nih a chim thanmi cu 'ralkap in kan lehrulmi hna hi a herh cangmi a si. Tapung bantukin Israel hi an cawlcang i, a herh ning kan lehrul cang hna lai. Ningani zan i kan missile in kan kah hna hnu cun voi tam tuk khua an ruat manh cang' a ti.
Israeli Defense Minister Avigdor Liberman nih a chim vemi cu 'an missile in kan van lawng a kan kahpiak than ahcun an ram runvennak system vialte kan hrawh dih cang lai. Kan i congor hrimhrim lai lo. Kan phomhpiak dih colh hna lai' tiah fak ngaiin a hro cang hna.
Hezbollah tapung sinah Syria nih hriamnam sangsang a pek lengmangmi hna hi Israel nih an duh lo tuk. Ni thum chungah voithum bak te an phomh manh hna. Israel sungthoh an thawng ti zong a lang. Syria ramchung zong an hrial lo. Syria nih Hebollah sinah hriamnam a pek than ahcun an phomh than rih ko lai. 'Hriamnam an pek chung hna paoh cu Syria ruangah a si i, tuanvo an lak peng lai' tiah a chim chih. Ref: TOI.