France khuapi Paris i a nganbikmi a pahnihnak ah aa telmi Orly Airport ah Muslim kalsual pa nih airport congtu ralkap nu meithal a chuh i, thi lak in an kah manh. Official nih an chimmi cu tuan deuh i ralkap a kaptu kha a si theo lai tiah an zumh.
Airport ah an kah hlanah hin motor in khua chungah a leng i, lam i minung chektu ralkap a kah cang hna. Ralkap pakhat zong a hliamh. Mah hnu cun a zam. Aa citmi motor zong midang motor a chuhmi hna a si tiah police nih an chim.
French Defense Minister Jean-Yves Le Drian nih a chimmi cu Orly Airport congtu ralkap pathum a tuaitam hna a ti. Minung pakhat meithal zong chuh a timh i, a pawngah a ummi ralkap pahnih nih an kah tiah a chim chih. A hmutu pakhat nih a chimmi cu ralkap nu meithal a chuh i a hrocer a ti.
A pawngah a ummi ralkap nih kah an vun timh ah kah a timh ve hna i, an kah manh tiah Dominque nih a chim. Minung dangdang aa hliammi cu an um lo. Ruah lo piin meithal puah thawng nih mipi thin a phanter tuk than hna tiah airport riantuantu nih an chim.
A luan cia kum hnih khan tapung nih an doh lengmang cang hna. Tapung kut him a him lo taktakmi ram ah an cang. Atu zong lunghrinhmi pakhat cu a um ko tiah police lei nih an chim. An kahmi pa hi Muslim kalsual a si tiah sungthoh upa nih an chim. A konglam dang cu an langhter lo. Ref: The sun.