Kum 20 chung nuclear hriamnam ngei kho lo ding in North Korea hi kan kham cang nain kan hlawh a tling lo. Atu cun a fiang ko cang. Lam dang in kan panh hna a hau cang tiah US State Secretary Rex Tillerson nih Asian ram a tlawnnak ah a chim.
Nilini kha Japan a um lio a si i, a chimmi cu 'Asia kan rak tlawnnak hna cu Japan, South Korea le Taluk hna he hmailei kan kalnak ding ah kan hmuh ning ceihmai ti awk ah a rami ka si' a ti. 'North Korea le an mipi zong nih US hi nan kan tih awk a si lo. US kan siah nan pawngkam ram an siah daihnak a duhmi lawng te kan si' tiah a chim chih.
Tillerson biachimmi cu North Korea caah thazaang ngai a si lai tiah an zumh. Zeitin dah N.Korea leiin an rak leh ve te lai a fiang rih lo.
'Cucaah cun US nih North Korea biaruah kan in duhmi hna cu nan nuclear le missile program hna hi ngol cang u law hmailei ah thinhunternak ser ti lo ding in i zuam ve u' tiah North Korea sinah biacahnak a chim. A peh thanmi cu 'Japan le kan hawile dangdang kan runvennak hna cu zeitik hmanh ah aa thleng lai lo' a ti.
Ningani ah South Korea ah a kal than. Cun Taluk zong ah a phan lai. Taluk President Xi Jinping zong a ton lai. North Korea nih a nuclear program a hlawtnak ding ah Taluk hi a biapi tukmi rian an ngei. UN nih N. Korea dan a tatnak zong ah Taluk nih fak piin aa zuam a hau tiah thazaang pekak bia zong a chim chih.
US State Florida ah a ra laimi April ah President Trump le Taluk President Xi tonnak a ngei ding an si. An i ton dingmi hram thlakpiak pah duh zong ah ton a duhnak a si. Ref: VOA News.