President Trump nih a voihnihnak Muslim ram ruk khamnak min a thutmi cu Hawaii State nih n vun doh colh. US State chungah a doh hmasa cem an si. March 16 in a nung dingmi Muslim le Refugee khamnak min a thutmi cu a hlanah a rak thut cangmi he aa dannak a um lo an ti. Asinain tutan ahcun Iraq aa tel ti lo.
Muslim ram ruk cu Iran, Libya, Syria, Somalia, Sudan le Yemen hna an si i, March 16 in a ra laimi ni 90 chungah US ah an lut kho lai lo; Refugee khamnak min a thutmi zong March 16 in a ra laimi ni 120 chung US ah luh khawh a si lai lo. January 27 ah a voikhatnak a rak thutmi cu ramchung le airport ah buainak a chuahter tuk tiah Federal Court nih an phihpiak than.
Asinain tutan a voihnihnak a thutmi zong a hlan he aa dannak a um lo. Iraq lawng a hnawh le pei a si ko cu tiah Hawaii Attorney General Doug Chin nih a chim. Kan state minung an siah businesses a siah kan sianginn a siah harnak a kan pek lai tiah tazacuainak ca a tial hmasa cem state an si. A rannak in kan khampiak than u tiah nithumni ah biceihnak zung ah ca an tial.
March 16 ah a nung ding a si i, biaceihnak nih March 15 ah biafianhnak an tuah te lai. President Trump le a cozah leiin zeihmanh fianternak le bialehnak an tuah rih hna lo. Fiang tein an chim cangmi cu kan ram runvennak le himternak hi hmaai kan i thlak lai an ti cang. Biaknak thleidannak zong a si lo. Tapung riantuannak kan dohnak a si an ti. Ref: BBC Nes.