Mexico in US ah phungning loin a rak lutmi cazin a vun tla taktak. January in February karlak hmanh ah 40% a zor manh tiah US cozah a phuan cang. Homeland Security chief John Kelly a chimmi cu 'President Trump khohcho phung ruangah phungning lo mipem an zor tuk manh' a ti.
Ningcang lo mipem kongah President Trump nih min a rak thut i, ramchung ah sualnak a tuahmi, thlaihhrem hmang le drug tawng tbk sualnak le huatnak he aa tlaimi paoh kuat than hna ding ti a si. US ah phungning lo mipem 11 million hrawng an um i, tam deuh cu Mexican an si.
Trump nih fak deuh in a vun rengh tikah tampi thlennak a vun chuah pi tiah thangthat a vun tong ngai. Asinain Mexico nih cun 'huatnak phung le cohlan awk tha lo phung (policy)' a si tiah fak ngaiin an doh. Nithumni ah Mr Kelly nih a chimmi cu January in February tiang ah ningcang loin US a rak lutmi hi 31, 578 in 18,762 ah a tal cang a ti.
'Cozah thar a kai hnuah thil thar kan hmuhmi a si. Kum nga chungah ningcang lo mipem an tlawm bik thla a si' tiah Homeland Security chief John Kelly nih a chim chih. Trump nih min a thutmi ah hin ningcang lo Mexican mipem (document ngei lo) paoh cu an ram ah kan kuat dih hna lai ti a si. Ramdang zong an i tel chih.
Asinain a runrun in kuat loin a thim in thim an si lai. Thimmi hna cu sualnak, drug, thlaihrem le buainak ah aa telmi an si lai ti a si. Kan ramchung ah sualnak le huatnak le thurhnomhnak kan thianh lai tiah President Trump nih campaign lio hrimhrim in a rak aupi cangmi a si. A vun tuah taktak i thatnak a chuah pi timi an hmuh cang. Ref: BBC News.