Georgia i US raltuknak tilawng hmun pawng in meng 20 aa hlatnak ah Russia sungthot tilawng a rak phan. US raltuknak tilawng hmun lawng si loin nuclear hmun zong a si. Thla hnih chungah a voihnihnak an rak rat hnawh hna zong a si cang. Expert nih cun an thazaang an vun i langhnak a si an ti.
Asinain Russia sungthoh tilawng The Viktor Leonov ah hin lamhla a kap khomi hriamnam aa tel lo an ti. Amahbelte cu midang biachimmi theih khawhnak thilri (h-tech) tbk cu aa tel tiah an chim. Expert nih an lunghrinhmi cu US ralkap cawlcanghnak le biaruahnak a theih khawh men ko lai tiah an zumh.
The Viktor Leonov hi 1980 hrawng ah an rak sermi hi a si i, US rili ah voihnih tiang nai thla chungah an hmuh cang. Kan hnu thla i an rak hmuh lioah cun meng 30 hrawng hlat in an hmuh. Asinain US he sukkhahnak a um sual lai tiah a hrial than hna.
US ralkap inn Pentagon in Capt. Jeff Davis nih a chimmi cu 'khuaruahhar ding a si lo. Kanmah zong ramdang ah kan tuah tawnmi a si ko' a ti. President Trump zong nih 'atu cun kan cawlcang rih lai lo. A ra laimi caan ah President Putin he biaruahnak ngei ding kan si.
Hmailei ah thil tha tu cuan ko rih hna u sih' tiah a chim. Nizan zong ah Yahoo company e-mail a ong i thlithup thil a firmi Russian sungthoh kong US State Department nih an phuan cang. Minung pakhat zong Canada ah an tlaih cang. Ref: The Express.