Kum 18 Brazilian tlangval pa cu misual pathum he an i phomh i fak tuk in a hngawng an hliamh. An tanpiak lo lawng a si. Tih A nung kho tuk. Thisen der nih cun zoh lo a tha; thisen thawng lawng nih zoh ding a si lai. Asinain amah cu a lu aa tun pah buin a zei poi lomi a lo rih.
Zoh ahhin thlingzaa taktak a si. A lu aa dawmh pah buin meng khat tluk a hlatnak in inn ah a rak tlung kho rih. Asinain inn a phanh hlan deuh ah lam pi an char.
Zarhpini ah police nih lam kam ah an hmuh i an char. A hngawng hma cu a rak fak ngaingai ko. Thih hau in an haupiak dih. Asinain police sinah a tonmi kong cu a chimh khawh dih hna. A chimmi cu 'misual pathum nih an ka bawh i an ka phomh. Ka thilri le phone an kan firpiak a ti.
A chim thanmi cu 'A thi cang tiah an ka kal takmi ka si. An ka tuk-velh ning a fah tuk cang tikah kaa thihter. I thihter hlah ning law an kan thah beh lai. A thi cang tiah thing tangah an ka kal tak' a ti.
A chim thanmi cu 'An kal cangka in an ra than sual lai tiah ka rak zam. Ka tli kho lo. Ka hngawng hma a fak tuk caah kaa tlaih pah buin duhsah tein ka rak ra' tiah police sinah a chim. A rannak in sizung ah an kal pi. A hma a fah tluk in a nunnak caah a tihnungmi a um lo tiah doctor nih an chim.
Police nih misual pawl cu an kawl cuahmah lio hna a si. Pablo Patrik de Souza zong zeidah a dirhmun a si. A tha deuh cang maw timi thawngpang theih khawh a si rih lo. Ref: The sun.