Syrian President Assad ralkap nih mipi cungah sivaidat (chemical) aa telmi hriamnam an hman. Minung 70 leng an thi i hngakchia 10 an i tel tiah report nih a tial. Sivadat ruangah a thimi hngakchia zoh ah hin khuaruahtam an si. Vawleicung hruaitu upa an lau dih i, an thinhunnak an rak langhter cio.
UK Official upa lei lengbang cu an thinhung kho tuk. A rannak in UN meeting au colh seh an ti. Syria nih mipi lakah sivaidat an hmanmi cu mipi cung ral ser bantuk a si an ti. 'Sivaidat an hmanmi kan hlathlai lai. A hmangtu cu sualphawt an si lai' tiah UK Foreign Secretary Boris Johnson nih a chim.
President Trump zong a thinhung kho tuk. 'Nihin i sualnak ngei lo hngakchia le nu telh in mipi cungah sivaidat a hman hi ngaihthiam awk a tha lo. Vawleicung ram hruaitu nih kan zoh sawhsawh ding a si lo' a ti. A chim thanmi cu 'President thing Obama cozah santlaih lo tuk ruangah a si.
'Red Line' na tan ahcun kan duh lai lo a rak ti i a vun tan taktak tikah zeihmanh a rak tuah lo i Syria cozah nih zeihmanh a kan rel ti lo' tiah Trump nih a chim. 'Mipi cung ral ser bantuk a si' tiah a chim chih. 'Zahpi awktlak thil tuah a si' tiah French Foreign Minister Jean-Marc Ayrault zong nih a chim.
Israel Prime Minister Benjamin Netanyahu nih 'mipi cungah hi bantuk tihnung hriamnam a hmangmi caah cun ngaihthiam khawhnak lam a um lo. Sivaidat a tuarmi hngakchia ka hmuh hna tikah ka lau tuk i ka thinhung tuk' tiah a chim.
''Assad caah hmailei a um ti lo' tiah UK Prime Minister Theresa May zong nih fak ngaiin a chim ve. UN Meeting biachahnak nih zeidah a chuah pi te lai hngah hmasa a hau. Fak tuk in thinhunnak an ser bantukin fak tuk dan an tat ve lai tiah zumh a si. Ref: CNN.