North Korea cozah chiat ning cu a chim in chim khawh a si lo. A ramchung minung mangtam nih a den lio hna ah nuclear le missile hriamnam cu dong loin a sermi an si. A mipi ei awk ngei lo tiang a chiah hna zong a poi a ti lo. Human rights buarnak hrim a min chia tuk.
Mah ruangah North Korea hruaitu tampi nih an rak chuah tak i, a zam takmi an tam ngai cang. Naite zong ah London ah thlahmi ambassador Thae Yong Ho zong a zam i North Korea ah a kir duh ti lo. Kim Jong-un nih thah ding in nawl zong a chuah cang.
Yong Ho nih a chimmi cu 'North Korea nih US le a hawile hi nuclear in kahnak lam a kawl lengmang lio a si. Nan thah hmasa lo ahcun anmah nih an i thah hna lai. Kim Jong-un nan kham khawhnak lam pakhat a ummi cu Kim Jong-un hi that u' tiah a chimh cang hna.
Yong Ho nih NBC News ah a chim chihmi cu 'US nih a ka tuk lai timi a theih ahcun a nuclear bom hi ICBM (intercontinental ballistic missiles) he a hman colh lai' tiah ralrinnak a pek hna.
A chim thanmi cu 'Kim Jong-un nih nuclear bom le ICBM a ngeih ahcun a duhmi paoh a tuah cang lai. Cucaah vawleicung ram nih an zoh sawhsawh awk a tha ti lo. Kan ruahnak nih a phak lo leng tiang in zei poah a tuah khomi a si' a ti.
'Nan kham khawhnak lam a ummi cu hruaitu a sinak in lak kha a tha cem a si' tiah a chim chih. North Korea hi nuclear hriamnam pariat hrawng cu a ngei cang, asinain US a kap khomi ICBM he an pehtlaihter kho rih lo ti a si. Hmai thla ah ICBM hneksak ding in timhnak a ngeih cuahmah lio a si.
President Trump hrimhrim cu a thinhung kho tuk cang. Taluk nih zeihmanh a tuah lo ahcun keimah ka cawlcang cang lai a ti. Taluk President Xi Jinping he tonnak an ngei lai i an ceih dingmi pakhat cu North Korea kong hi a si te lai. Ref: The sun.