Dr David Dao hi kum 69 a si cang i fanu-fapa pa nga a ngei hna. A fale panga chungah minung pali hi Doctor an si. US Kentucky State ah an um i, an khua taktak hi Taluk maw an si Vietnam dek an si. Cheukhat news nih cun Vietnam an ti i, cheukhat nih cun Taluk a si an ti.
Asinain United Airline chung i an dawh lioah a chimmi cu 'Taluk ka si ruangah thleidannak he a ka chuahmi a si' tiah a chim. Amah hmurka in Taluk ka si a ti. US an rak pem hi 1980 hrawngah a si i, a nupi Teresa hi hngakchia lei doctor a si. Kentucky i Elizabeth khua ah rian a tuan.
An fapa upa cem Tim hi kum 34 a si i, Texas ah sibawi rian a tuan; a changtu hi Ben hi kum 31 a si i, doctor a si ve; a pathumnam an fanu min Christine a si i doctor a si ve. An fa hniang bik Angela zong Kentucky University ah doctor a dihmi a si. Doctor chungkhar an si.
Dr Dao hi Hardin Memorial Hospital ah a hlanah cun a rak tuan. Asinain a hnuah hrokhrol le phungning loin si cawk-zuarhnak a rak tuah. A hnu deuh a mizaw pa drug a rak chunh i sex a rak tuah pi. 2003 ah an laisen an rak chuh. 2015 ah laisen an rak pek than. A tuanbia a rak i dawh lo ngai ve.
Tutan thil a tonmi zong mizaw zoh ding ka ngei hna tiah a rannak in Chicago in a khua ah tlun aa timmi a si. A rannak in inn phanh i mizaw zoh ka duh hna tiah a nawl len hna zong ah an duh lo. Hramhram in an dawh i lengah an chuah. A video le hmaanthlak a hmutu kip cu an thinhung dih.
Chicago sizung ah a um lio a si. A chungkhar le sihni pawl nih zeihmanh kan chim rih lai lo. Sizung in chuak hmasa ko seh an ti. United Airline hi taza an cuai men te lai. United Airline zong an sipuaizi a tla dup ko. Zanlei sang belte ah a vun kai deuh ciahmah than an ti. $1 billion hrawng an tla tiah CNN nih a tial.