Vice President Mike Pence nih ningani Israel Prime Minister Netanyahu phone in a chonh colh. US nan kan dirkamhmi cungah President Trump aiawh in kan lunglawmhnak chim kan duh. A hleiin Syria kan kahmi kongah fek tein nan kan dirpi caah kan lunglawmhnak kan chim' a ti.
Syria Airbase an kahnak ruang le konglam dangdang zong fianternak a tuah chih hna. Sivaidat an karh lo ding le an hman lo ding hi kan duhmi a si. Hmailei zong ah kan kham lengmang lai tiah a chim chih. Israel le US pehtlaihnak zong kan thawnter chin lengmang lai tiah ceihmainak an ngei.
US nih Syria Airbase a kah cangka in Israel nih an dirkamhnak an vun langhter colh. Nitlak ram dangdang zong nih an dirkamhnak hna an vun langhter hna. Iran, Russia le Taluk le an hawile zeimawzat lawng nih an an lungtlinnak le US an mawhchiatnak an langhter.
US nih Syria Airbase an kah hlanah Israel ralkap upa sinah thawng an thanh hmasa hna. Kan in dirkamh hna tiah Israel ralkap upa lei nih a chimh hna. An kah hnuah Israel lei nih an chimmi cu 'President Trump nih 'a tuahsernak le a bia in a thawng tukmi bia a chim' an ti.
President Trump nih Syria a kahmi hi Syria lawng si loin Iran, North Korea le a dangdang ca zong cawnpiaktu tha a si lai an ti. Israel sungthoh lei upa Yisrael Katz nih a chimmi cu 'Syria an kahmi nih America lianngannak le vawleicung hruaitu a sinak a langhter than cang' a ti. Ref: TOI.