Kim Jong-un hi a molh lo. Khuaruat lo zong a si lo. A hrutmi zong a si lo. Kanmah American tu nih hin kan i palh tawn i kan ral paoh hi an molh, an hrut i khuaruat lo ah kan ruah tawn hna. Ramdang vialte hna hi kanmah lam ah kal dih hna seh ti kan duh. Kanmah lam an zawh duh lo tikah mi chambau ah kan ruah tawn hna.
Kanmah caah tihnung tiang in kan ral hi kan zohchuk tawn hna. North Korea hruaitu Kim Jong-un nih a kan hrocermi hi a sawhsawh a si lo. Tihnung ngai dirhmun ah a um. Kim Jong-un nih a ralkap upa le a riantuantu upa a thah hna tikah raltuknak vanlawng kahnak in a kah hna. South Korea nih cun a hmaanmi a si an ti.
Kim Jong-un nih a unau pa Kim Jong-nam thahnak kha nawl a pekmi hna i, mi ramdang cio in sivaidat thalo in a thahter hna. A tuahto ning hna hi zeitluk in dah a tihnung i a sual timi theih khawh an si. Asinain sullam ngei loin rian a tuan lo. A unau zong ui loin a thah i a rantuantu upa zong an palh tikah a thah hna.
Kim hi a sual ko lai, asinain sual timi le hruh timi hi aa dangmi zong a si i, khuaruahnak ngei lo he zong in aa dang. President Trump nih cun santlai lo a nihsawh hna, thongtla a nihsawh hna. Mexico zong a hrocer; Australian PM Malcolm Turnbull zong phone a chiah kanh; German hruaitu Angela Merkel zong $374 billion nan kan bat a ti.
Kim nih cun thil pakhat lawng aa tinhmi a um. A cozah le a uknak thihter lo hi aa zuam i a lam kip in a runven. A cozah le a uknak runvennak ding ahcun a unau thah zong a poi ah a chia lo i, a riantuantu upa hna thah zong a poi ah chia lo. President Trump nih cun 'nuclear ka ngeihter lai lo' a ti.
North Korea hi a thin kan hunter lengmang peng ko ahcun kan duh lomi hmun tiang kan phan te lai. Hi tluk in a ram a runven lioah zeihmanh ah kan ruahpiak lo i kan theihthiampiak lo achun a tihnung tukmi hmun ah kan phan taktak lai. Cucaah North Korea hruaitu Kim Jong-un lungput zoh in US zong nih biaruahnak lam a kawl a hau.
Biaruahnak lawng hi US le North Korea karlak huatnak damtertu a si lai. US nih biaruah a thiammi, North Korea kong a theimi le an bia ngaih zong a thiammi minung hmang in cabua ah North Korea hi a thut pi han ding a si. Cuticun US nih a duhmi a hmuh lai i, North Korea mipi ca zong ah thil tha a si lai.
By
Jonathan Cristol