Aw that le hlasak thiam hi aa dang i, aw that ngai i hlasak a thiam tuk lomi an um. Aw that lem tung loin hlasak a thiam ngaimi an um. Kokek in aw tha hi an um i, cawn chawm in hlasak a thiammi zong an um. Hlasak thiam kan timi hna hi hlasak an rak cawng tuk hna.
Laimi chungah ahodah a aw zong a tha i hlasak zong a thiam bak timi hi thim hna u sih law an tam lai lo. Asinain aw tha lawng in thim ahcun an tam lai i, hlasak thiam lawng in thim hna zong ah an tam pah lai. Pahnih in a kemhmi cu an tam tuk men lai lo.
Cu chungah atu lio a thangcho cuahmahmi Sui Hlawn Rem hi a aw tha bakmi a si. Hlasak zong a thiam nain aw thatnak nih a tei deuh. A aw cu a tha lawlaw bak a si. A hlasak hi ngaih hna lengmang tikah khuaruahhar a si. Crudsade an tuah i hlasak an sawm caan i hla a sakmi ngaih tikah khauruahhar a si. Hlaphal chung naak in a lengah a aw that a zual khun.
A aw maang hrimhrim a tha i a khing bak in a khing. A aw zong a sang i, hla khi (key) sang a sak deuh paoh ahhin a aw that a zual chin lengmang fawn. Mino te a si i, a hmalei caah ruahchannak nganpi a ummi a si. Pathian a duhmi zong a si i, Pathian hla lawngte a sami zong a si.
Sui Hlawn Rem aw a ngai i a theimi paoh cun Laimi ahcun a aw tha cem a si ko lai an ti dih. Hlasak zong a thiam chin lengmang tikah cun Laimi hlasak thiam bik pakhat dirhmun a phan te lai tiah an zumhmi a si. 'Kan Pathian Aw Lawng Kan Damnak' hla a sakmi tha tein rak ngai ve.