Siangpahrang William 34, cu Kensington Palace i a inn chung laptop hmaiah a thu. Pop star Lady Gaga zong Los Angeles i a inn chung coka laptop hmaiah a dir ve. Online in sau lak te biaruahnak an ngei. An pahnih in tu zing ah 'Heads Together Campaign' kongah biaruahnak an ngei.
'Heads Together campaign' an tuahmi hi lungthin zawtnak (mental health) a ngeimi hna bawmhchannak caah an tuahmi a si. Lungthin zawtnak a ngeimi kip biahalnak an tuah hna i film an lak hna. Naite ah khan an chuah. Mah cu tu zong ah ceihmai tinak an ngei.
Lady Gaga 31 nih an riantuanmi kongah thangthatnak zong a chim. Cun lungthin zawtnak a ngeimi nih an konglam an chimmi film an lakmi zong 'aa dawh tukmi tuanbia an si' tiah a thangthat hna. October thla chungah tonnak ngei ding in timhnak an ngei.
Lungthin zawtnak a ngeimi hna zeitin dah kan bawmh khawh chin lengmang hna lai timi kong an ceih lai. 'Fak piin kan i zuam lai. Minung kelte ah an can khawh than cio naak hnga ding ah din loin rian kan tuan lai' tiah saduhthahnak an ngeihmi zong an chim.
William le Lady Gaga an i pehtlaihnak aa thoknak cu ni kum ah Lady Gaga nih a tuanbia a rak chimnak in a si. Kum 19 ka rak si lioah tlaihhrem ka rak tong i, mah hnu cun Post Traumatic Stress Disorder (PTSD) timi lungthin lei chambau ka rak ngei tiah a chim.
Hi bia a chim hnuah William nih Heads Together Campaign' ah tel ve ding in a rak sawm. Lady Gaga nih a chimmi cu 'ka lungthin put ning aa thlen deuh hnu in ka nunnak zong aa thleng chin lengmang than. A hramthok ahcun ka si ning kong chim hi ka rak ngamh set lo.
Lungthin zawtnak ngeih cu ning a zak tuk. Zingka ah ka tho i kaa nuam kho lo. Hlasak ding in stage cungah vun kai than i hla vun sak ding hi a fawi lo. Fianter hi a har tuk hringhrang. Nunnak ah zeidah a palhnak a um hnga ti awk in ka um lengmang' tiah a chim. Ref: The Express.