North Korean riantuantu upa hi Kim Jong-un ko an lo hna i an huaisen kho taktak hna. Australian Foreign Minister Julie Bishop nih 'kalsual Norh Korea hi dantat than ding in kan ruah cuahmah lio a si' tiah a chim. North Korean official nih an vun phomh colh.
Communist ram North Korean Vice Foreign Minister Han Song-ryol nih a chimmi cu 'Australia (Canberra) hi mitcaw bantukin US kalnak lam a zulh lengmang ko ahcun kan thinhunnak a tuar te lai. Anmah le anmah an i thah bantuk a si te lai' tiah a hrocernak bia a chim.
Missile le nuclear a hneksak lengmang ruangah North Korea hi ramdang nih cun an hlat chin lengmang cang. A hrom an reh i dih bantuk a si. Taluk nih dirkamh lengmang hlah seh law mangtam in a mipi an thi dih cang lai. US hi mitcaw bang na zulh i kan ram harsatnak pek na tim tiah Australia zong a vun phomhnak a si.
Nilini ah Australian Foreign Minister Julie Bishop nih a chimmi cu 'North Korea cawnpiaknak ding ahcun dantat (sanction) hi a tha bik ko. A cawlcangh le a ziaza hi zoh khawh a si ti lo. Kan ram pawngkam hrawngah nuclear ram North Korea kan cohlang kho ti lo' a ti.
US a hrocer cuahmah lioah Australia zong a vun hrocer than cang hna. US raltuknak tilawng le raltuknak vanlawng phurtu tilawng zong Japan rili leiah an rat cuahmah lio a si. North Korea nih cun hrocer bantuk ah aa ruah than lai i, a linsa than te ko lai. Ref: teh sun.