Vawleicung ram kip ah Laimi kan phan hna i kan umnak kip ah Khrihfabu kan dirh hna. Khrihfami kan si bantukin Khrihfabu loin kan um kho lo. Khrihfa kan sinak cu fiang tein Khrihfabu kan dirhmi nih a langhter lengmang. Pathian lung zong kan lawmhter ko lai tiah ka zumh.
Laimi umnak kip ah Khrihfabu an ummi nih hin Laimi zong a kan dawhter i, zei bantuk miphun dah kan si timi zong an langhter zungzal.
Laimi umnak kip ah Khrihfabu an ummi nih hin Laimi zong a kan dawhter i, zei bantuk miphun dah kan si timi zong an langhter zungzal.
Asinain Bible charhchan in si lem loin ka hmuhmi chungin kan chambau deuh ko rua tiah ka ruahmi langhter ka duh. Ka Miphun hawi Laimi dang cio zong nih zeitin dah an hmuh ning cio a si hnga timi theih ka duh ngai. Keimah hi Malaysia ah a ummi ka si i, Khrihfabu cu kan ngei. Pastor zong kan ngei i, thla fatin in lahkhah kan pek. Khrihfabu zohkhanhtu ah kan chiahmi a si. Kan taksa le kan thlarau kongah tuanvo ngei bantukin an si.
Riantuan kan si tikah biakinn kan phanh khawh lo caan hi a um pah lengmang. Asinain kan cheuhra-cheukhat cu biakinn kan phanhter lengmang. A caan ahcun retheih le thabat par ah zu hna kan ding; beer hna kan ding, kuak hna kan zu i cuticun taksa in kan nun caan hi a tam ngai. Kanmah naak in a zual deuhmi zong an rak um rih hna. Ka tha deuh tinak si loin kan dirhmun aa dannak ka langhter duhnak!
Cheukhat cu biakinn ah aa pum khomi zong an um lengmang ko. Riantuan lawng te kan si tikah hawi he hmuhton hi a har i zarhpini cu kan zumhnak ca a siah kan taksa ca a siah a sunglawi khun. Zarhpini i biakinn phanh khawh cio cu kan duh tuk. Biakinn a phan kho lengmangmi lakah a phan kho lo tawk zong kan rak um lengmang ve. Nun hi fel ngai lo ahcun daitlan in hell ram leiah kal pi thluahmah sual a fawi hringhrang ko.
Hi bantuk caan lioah kan hlam bikmi hna cu kan Pastor te lengmang an si. Biakinn kan phan kho lo; hawi sinah Pathian kan thangthat kho lo; Pathian bia kan thei kho lo; nun hi thihnak tlangpar ah a phan lengmang. Cu lio i kan hlam cem hna cu Pastor te nih kan leng kho hna seh Pathian bia tbk in thazaang kan pek kho lengmang hna seh law a tha tuk hnga ti hi a si.
Ningcang loin khuasa le zudin le saei in a tlawmglengmi hrimhrim hna hi zoh sawhsawh awh an tha lo. Pastor le mi sawhsawh cu minung mithmuh ah kan i dang i kanmah nih kan chimh hna i kan cawnpiakmi hna hi khi cu zeihmanh a si lo. Pastor te nih tha tein an cawnpiak hna i an zohkhanhmi hna cu an tha deuh lengmang ko. Hi bantuk caan ko ah hin Pastor kan herh khun hna. Kan vaivuan hringhrang ko hna.
Kan i manh caan ahhin kan leng lengmang kho pah hna seh law kan duh tuk hringhrang ko. Ka lungtlin lo ngaimi pakhat cu phung an i ser i len caan a kan tuahmi hi a si. Kum khat ah voi hnih - thum taktak lawng hna kan inn an phan i thla a kan campiak. Kan herh caan ah thlacampiak kan tonmi naak in kan herh lo lio caan thlamcampiak kan ton hi a tam deuh.
Chim duhmi cu thlacampiak poah le Pastor vehvet poah cu a tha ko nain kan herh lio caan i Pastor lenkai hi a rak biapi khun. Pathian riantuantu an si bantuk le Pastor an si bantukin an Khrihfabu caah cun len caan hna hi cu ri khiak hna hlah seh law kan duh tuk ko. Kan um lio caan le kan inn an rat caan hna aa ton lo ahcun kum khat chungah kan inn ah voikhat hmanh zong an lamh lo caan a um.
Kan phunzan le kan lungfah zong hi kan mawh hrimhrim lo tiin ka ruah. Phone te zong in chawn ve tuah hna ning ti zong kan tong lo. Khrihfabu ngei lo le Pastor ngei lo zong kan lo tawn. Tuu tlau timi kha ka mitthlaam ah a cuang lengmang. Kanmah hi congtu le zohkhanhtu ngei lo tuu tlau timi pei kan si ko hi tiin ka ruah tawn. Malaysia cu umnak hi a kau tuk i phone chawnh tel hi cu daithlan awk a tha lo.
Pathian riantuantu kan si. Lungtho tein aa timmi kan si. Zaanghlei a cawi ding kan si. Nunnak pek in riantuan ding kan si timi an theih tawn lomi hi a poi ah ka ruah cemmi a si. Rian fialmi Pastor hna an lo tawn; hnek chihmi Pastor hna an lo tawn i, an hmai khah zong a si tawn lo. An duh ning in kan um khawh lo caan paoh ah an zai i, mipi cungah an lungfak fawn.
Hlakphak ti phu pek awk ngeih lo lengbang ahcun Pastor lenkai zong hi ngamh a si chin lengmang ti lo. Cucaah kan Pastor te nih retheih cawi in an chungtel kong hi biatak tein tuanvo kan lakpiak deuh hna seh law ka duh lo. A hleiin kan thlarau nunnak kong hrimhrim hi cu an thih-nunnak tluk in a biapi ah kan ruahpiak kho hna seh law tiah ka lung duh bia hi capar tawi tein ka langhter.
(Note: Min langhter a duh lomi Malaysia ah a ummi Laimi pakhat nih a tialmi a si. Hi ca a tialmi hi Malaysia dirhmun lawng si loin vawleicung ram kip Laimi vialte nih ruah cio ding in kan tarpiak. TCP nih edit kan tuahpiakmi cungah theihthiam kan hal duh fawn).