Mipi cungah sivaidat aa telmi hriamnam a hman i minung tam tuk an thih caah President Trump nih Syria kah ding in nawl a chuah cang. An phomh taktak cang hna. US raltuknak tilawng nih Tomahawk Missile in Syria raltuknak vanlawng hmun ah voi 59 an kah cang.
An kahnak hmun hi sivaidat in mipi a kaptu hna Syria raltuknak vanlawng hmun a si. Atu an kahmi hna hi US nih direct in a voikhatnak Syrian President Bashar Al-Assad an kah a si. Syria cozah he ralthawh bantuk a si cang.
President Trump nih a chimmi cu ''tuzan ah Syria sivaidat hriamnam a hmangmi raltuknak vanlawng hmun kah ding in kan ralkap nawl ka pek cang hna. Hi bantuk hriamnam an hman lo ding le a karh lo ding in kham hi US kan himnak caah a biapi tukmi a si' a ti.
'Al ding a um lo. Syria cozah nih hman lo ding tiah khammi hriamnam thalo an hman. Hi bantuk hriamnam thurhnawn hman lo ding tiah khammi phunglam a buar. UN nih an chimh lengmangmi zong zeihmanh a relpiak hna lo. Kum tampi chung a ziazia hrimhrim zong aa thleng lo' tiah a chim.
Tutan Syria a kahmi hi campiagn lioah a chimmi he cun aa dang ngai. Asinain sivaidat in a thimi hngakchia hmanthlak nih a thinhunter tuk. Mah ruangah Syria a kah colhnak a si an ti. US ralkap inn pi (Pentagon) leiin an chimmi cu Mediteeranean rili hmunkhur US raltuknak tilawng in an kah hna an ti.
Secreatary of State Rex Tillerson nih a chimmi cu 'lam sen a tan i ningcang loin a ummi paoh cu President Trump nih zoh sawksawh aa tim hna lo timi tutan ah a lang. Tutan kan kahmi hna hi a phu ko. Sivaidat hriamnam a hmannak hmun kan kahmi a si. A herh ahcun hmailei zong ah kan peh than ko lai' tiah a chim chih.
US ralkap lei upa nih an chimmi cu 'nilini zan Syria raltuknak vanlawng hmun kan kah ah hin Russian zong an um ko an ti. Tillerson nih a chim thanmi cu 'Syria kan kah lai ah Russia zong thawng kan thanh. Syria kongah Russia le US sukkhak lo ding in phunglam kan ngeihmi kan buar lonak ding in Russia sinah theihternak kan tuah tiah a chim.
Trump a soisel taktakmi Senator John McCain le Lindsey Graham zong an lungtling kho tuk. President Trump biachahnak zong an thangthat len. 'US hi kan um sawhsawh lai lo timi fiang tein a langhter' an ti. Ref: CNN.