North Korea hmursau le leksuai nih Taluk a neng tuk cang. Dongh hngal loin US a hrocer lengmang i Taluk nih a vun cak cang. North Korea Vice Foreign Minister nih 'zarh fatin zong in nuclear kan hneksak ko lai; thla fatin zong in kan hneksak ko lai' a ti cangka in Taluk nih an vun cak colh hna.
Taluk Foreign Ministry leiin biachimtu Lu Kang nih 'nai hrawnghrang North Korea nuclear le missile hneksaknak hi a sawhsawh a si ti lo. Lungrethei ngai a si cang' tiah a chim. America leiin lehrulnak bia an chim zong a vun thangthat hna.
'American official nih an chimmi hi a tha tuk. Sersiamnak biachim a si. North Korea nuclear kongah daihnak in sersiam an duhmi hi thil tha tuk a si. Hi bantuk lungput hi a hmaan i ahopoah nih kan i tlaih cio ding a si' tiah US thangthatnak bia a chim.
Nizan ah Taluk nih North Korea rili ah a raltuknak tilawng a thlah hna i, missile zong an kah len. North Korea leksuainak nih Taluk zong a neng tuk cang hna timi a lang. Tuan deuh ah khan North Korean Vice Foreign Minister Han Song-ryol nih 'US nih a ralkap a hman ahcun kan thazaang dih-umnak in ral kan tho lai' a ti.
Lu Kang nih 'kha bantuk biachim in thatnak le sersiamnak a chuahter lai lo. Bia le tuahsernak in pakhat le pakhat i doh hi kan doh tukmi a si' a ti. President Trump zong nih North Korea chak hi reng deuh u tiah atu le atu in a chimh cang hna. North Korea cu Taluk kut ah a um lio a si.
Taluk nih a tuah hnga dingmi a tuah lo ahcun North Korea caah caan sau pi a um ti lai lo. A phomh ko hna lai. Tuaktan kho nih an chimmi cu 'Nuclear ram taktak si ding cun Taluk zong nih an duhpiak hna lo. US he raltuk ding zong an duh lo, zeicatiah refugee harsatnak a um dingmi hi Taluk nih an duh lo an ti. Ref: CNN News.