'North Korea hi buarnak ser aa tim lengmang. Taluk nih zeihmanh a tuah lo ahcun Taluk loin US nih tuanvo kan lak cang lai" tiah Taluk President Xi Jinping he an i ton hnuah a tial than. Taluk leiin a siah North Korea leiin a siah thawngpang an linsa ngaingai cang.
Taluk nih ramri ah a ralkap 150,000 a thlah cang hna. US nih North Korea hi kap sual seh law North Korean refugee a bungh in aa bung ding an si caah a hlankan in timhnak an ngei cang. US nih Syria a kah hnuah North Korea nih nuclear in kan kah hna lai tiah an hrocer hna.
North Korea hi US nih a kah te ko lai tiah Russia nih an thinphannak an vun langhter colh ve. Syria a kah khawh ah khan US nih a raltuknak tilawng phu pawl North Korea leiah a rak thlah hna. North Korea nih an chimmi cu 'US ralkap umnak hi kan nuclear nih a kah khawhnak hmun ah a ummi an si' tiah hnangam ngaiin an chim ve.
Syria a kahmi zong kha 'ngaihthiam awk a tha lomi ramdang namneh a si' tiah North Korea nih fak ngaiin an phomh hna. Tu zing zong ah US nih a kan kah ahcun kan nuclear in kan kah colh hna lai. Kah ding in timh cia kan si cang tiah a ramchung news nih a tial.
A tial thanmi cu 'South Korea ah a ummi US ralkap an siah US ramchung ralkap an siah rili cung an ralkap an siah kan nuclear nih an cawlcanghnak vialte an hmuh dih hna' tiah a tial. Zahan zan ah North Korea foreign ministry leiin upa pakha nih a chimmi cu 'North Korea tuk ding in timhnak an ngeihmi hi a tihnung tukmi hmun ah an um cang' tiah a chim chih.
US dironh ding in kan i tim cia dih cang. A tuahsernak vialte a tuar dih lai. A kan kah ahcun thawng tuk in kan lehrul lai. Kan hriamnam thawng tukmi in fak tuk in kan doh hna lai. A thawng tukmi ralkap le hriamnam kan ngei cang' tiah North Korea foreign minitry official pakhat nih a chim.
Taluk zong aa tim cang. Syria a kahmi hi North Korea ralrinnak peknak a si an ti. A ramri i ralkap a thlahmi hna ahhin sibawi le mi bawmtu zong an i tel len ti a si. Ref: Daily Mail.