US le North Korea hrocernak hi a linsa chin lengmang cang. An kan kah ahcun nuclear in kan phomh colh hna lai tiah North Korea nih a bawh cang hna. US nih a kap taktak lai maw timi hi theih a har.US nih kah a duh cangmi cu a lam a kawl a kawl i a kah ko hna.
Iraq zong kah a rak duh i a kah khawhnak lam a kawl a kawl i ramdang tampi hnatlak pi loin a rak kah ko. North Korea hi teh a kap lai maw timi hi atu lio an dirhmun cun ruah a phu ngai. Taluk Foreign Minister Wang nih cun thinphan ngaiin a chim cang. Biatak tein raltuknak kong a chim.
'Ral a chuah ahcun a phichuah cu hrawhhralnak lawng te a si ko lai. Ahohmanh teitu an si lai lo. Nan pahnih in pakhat le pakhat hrocernak bia le hla hi ngol u law baruahnak in kan phisin ding a si' tiah a chim. Pyongyang le Beijing karlak a zuangmi Air China zong caan karlak an dinhter chung.
President Trump Le North Korea Hrocernak A Fak cang
Nikhatni in a zuang than te lai ti a si. Hrocernak a um chin lengmang tikah khualtlawng an tlawm chin lengmang. Taluk hi North Korea nih a nunnak caah aa bochan bikmi an si. Taluk ah meihol an zuarmi hi an i bochan cemmi a si.
Taluk nih a phihpiak hna ahcun a harsa taktak ding an si. Mah ruangah Taluk hi US nih a nawr lengmang. North Korea hi na cawnpiak i na rengh a hau an ti lengmangnak a si. Vice President Pence zong Asia ram a rak tlawng hna lai. North Korea dantatnak kong a ceih pi men hna lai tiah zumh a si. Asinain North Korea kong ahcun a rak tlawmmi hna cu a si lo. Ref: CNN News.