North Korea le US cu nuclear raltuknak tlang par ah an um cang. An i entainak a linsa peng rih. Nirukni zing i missile a thlah than hnu cun US thin a hung ngai cang. UN Security Council tiang ah Taluk he an i phomh cang. North Korea cungah ralkap hman lo ding tiah ralrinnak zong an pek.
US president Ronald Reagan chan lioah cozah riantuantu upa thing pakhat nih a chimmi cu 'US nih Russia le Taluk phomh ding in timhnak a ngeih hna a ti. Paul Criag Roberts nih a tialmi cu 'naite ah ka tial cang, nuclear in US nih Russia le Taluk phomh ding in a timh hna a ti.
US nih phomh a timhmi hna hi kan lehrul kho hna hlah seh ti a duh ruangah a hlankan in phomh a timh hna tiah Mr Robert nih a chim chih. 'Ruah ngam zong a si lo. Asinain Washington nih tuah a timhmi a si. A tawinak in ka chim cun, nuclear raltho ding in Washington aa tim cang' a ti.
Asinain Roberts chimmi a hmaan lai le hmaan lai lo theih a si lo. Russia le US karlak ahcun a chung tein entainak a um. 'Russia le US pehtlaihnak a chiat bik lio caan a si' tiah Trump cozah zong nih an chim. Taluk he cun an tluang ngai ko. Taluk President Xi zong hi 'mi tha' a si tiah Trump nih a thangthat len.
Tu kum tuan deuh ah khan US ralkap upa lei nih an report mi cu US hi Russia he raltho u sih seh law kan sung kho men an ti. Russia ralkap le hriamanam hi kan ruahnak leng tiang in a thangcho i an sang cang an ti. Document nih a tial thanmi cu 'kan ralkap training pekmi a tlawm pinah thilri tling an ngei lo' a ti. Ref: Express.