Camapign lioah cun President Trump nih Russian President Vladimir Putin he lamleng ti ding in chunmang a rak manh. President thing Obama le Russian President Putin pehtlaihnak zong fak ngaiin a rak soisel lengmang. 'Hruaitu tha a si' tiah Putin cu a thangthat ngaingai fawn.
Khatlei in Taluk cu 'ningcang loin tangka' zuartu an si, US rian firtu zong an si, chawlehthalnak tax zong ka lak cang hna lai, cun President ka tlin ahcun kan ram an tlaihhrem lengmangmi ka donghter cang lai' tiah fak ngaiin a rak hrocer hna.
Asinain Presiddent a tlin taktak hnu cun thil sining aa thleng ngaingai. Vawleicung ah US nawlngeihnak le thawnnak hmual langhter a vun timhmi nih thil sining a thlen thluahmah. Sivadat nan hman hrimhrim tiah Syria a kahmi nih Russia thin a hunter ngaingai. 'Russia he lamleng ti ding kan rak si lo hrimhrim' tiah President Trump nih Syria a kah hnuah a chim.
'Taluk President Xi he cun kan i theihthiam ning a tha tuk' tiah tonnak an ngeih hnu cun a chim than cang. President Putin nih Russia TV ah a chimmi cu 'Trump cozah ah Washington le Moscow pehtlaihnak a chiah chin lengmang' a ti. Asinain President Trump nih nilini ah twitter in a tialmi cu 'US le Russia pehtlaihnak a tha than ko lai.
NATO, US le Russia hna lam an len ti khawh ahcun zeitluk in dah a that hnga. Kan lung a fim cio tikah cun daihnak kan ngei te ko lai' tiah a tial chih. Nihnihni ah khan President Trump nih twitter in a tial thanmi cu 'Taluk nih North Korea chak an rengh khawh ahcun US he chawlehthalnak an tuahmi a tha deuh chin rih lai. Asinain A chak an rengh khawh lo ahcun US le kan hawile nih kan rengh lai' tiah a tial.
Taluk nih North Korea kongah an thinphanmi cu 'US nih a kah sual ahcun North Korea hi fekfuan loin a um sual ti a phang. Cun refugee tam tuk a ramchung ah an luh dingmi hi Taluk nih a ngeihlah tuk. Taluk foreign minister Wang nih fiang tuk in a chimmi cu 'ralkap loin biaruahnak in North Korea kong hi kan phisin lai a ti.
Kissinger Institute ah professor Sandy Pho nih a chimmi cu 'President Trump nih Taluk le Russia pehtlaih ning hi a thei thlu lo tiah ka zumh. Russia le Taluk hi foreign policy kongah an i khat i, ramchung sandahpiaknak kong zong an i khat cun US an hmuh ning zong aa khat a ti.
An ramchung sandahpiah a duh lomi ram an si. US nih vawleicung ah nawl a ngeihnak zong hi an duh ti lo. Anmah langhsar an duh chin lengmang cang. Vawleicung ah an miaknak ding lam kawl ah an tho chin lengmang cang' tiah CNN ah a chim.