2016 US thimnak campiang an tuah lioah Russian nih National Security Adviser thing Micheal Flynn an rak kawmh i bia an rak ruah. US sungthoh nih an biaruahnak an rak ngaihpiak hna tikah zeitluk in dah Russian an rak i phorhlawt timi an theih hna.
Flynn he pehtlaihnak an rak sermi cungah phorhlawtnak bia tlangtlang an rak chimmi an theih len hna. Russian nih an i zuammi cu Flynn hi kan tei lai i Trump zong kan teiter chih lai tiah an i zuam. Trump a tlin tikah Flynn cu National Security Adviser ah a hman taktak.
Asinain Russian he an i pehtlaihnak kongah a dinfel lonak a langh colh caah zarh zeimawzat a tuan hnuah an phuah colh than. Naite ah report a langmi cu Obama zong nih Flynn hi rian pe hlah tiah Trump ralrinnak a rak pek cang. Senate Judiciary Committee hmai zong ah Flynn dirhmun a tihnunnak an rak phuan cang.
Attorney General Sally Yates nih a chimmi cu 'Micheal Flynn nih Vice President Mike Pence sinah Russian he aa pehtlaihnak tha tein a chim lo' tiah a rak chim. Inn Raang upa dangdang pawl an thinphanmi cu ni tlawm te karlak hmanh ah Flynn hi zumh awk a tlak lo ahcun a rauh deuh ahcun tihnung a si lai timi an hmuh.
Russian nih an tuksawh cikcek hnu ahcun US ca zong ah a tihnung i Flynn ca hrimhrim ah a tihnung. 'Russian sungthoh pawl hi 'blackmail' tuah an thiam tuk i, caan rak rau seh law Flynn nunnak ca tiang ah tih a rak nung. Sualnak pakhatkhat an rak tuahter lai i, a nunnak an rak hloh khawh menmi a si. A rian an phuah kha a luatnak a si' tiah New York Times nih a tial. Ref: TOI.