Philippines ah ISIS aalan naak pipi an thlai chin lengmang cang. Zarh khat chungah minung 103 leng an thi cang. Philippine i Marawi khuapi cu ISIS pawl nih khuaci an muih cang hna. Philippines President Duterte nih ralkap uknak tangah a chiah cang.
May 25 ah khan ISIS nih ruah lo piin an luh hnawh hna i an lak colh. Minung 200,000 hrawng umnak khua a si. Khuami pakhat Chico Usman nih a chimmi cu 'an hmai khuh he khua chungah an rak lut i kan tih tuk hna' tiah a chim.
A thaizing in cun cozah ralkap he an i kah thawng kan theih thluahmah cang' tiah a chim chih. A chim thanmi cu 'an aalan ah Pathian dah ti lo cu pathian dang an um lo timi an tial. Khua chung hmun kip ah an thlai dih cang hna' tiah a ti.
An i kahnak ah khua chungmi 19 an thi i, ralkap 11 an thi, cun police pali an thi cang. ISIS 61 leng an thi cang tiah Philippines ralkap lei nih an chim.
An thinphan ngaimi cu ISIS nih Asia nichuah-thlang ah Islamic ram an ser te lai tiah an zumh. Philippines khua Mindanao khua zong hi Islam State ah kan ser cang tiah an aalan zong an tlai dih cang. Asia in Nichuah-thlang ah ISIS cawlcanghnak a kau chin lengmang cang.
ISIS nih video zong in an chim lengmang cang. Iraq le Syria ah a kal kho lomi kan unau hna Asian ram Philippines ah kal dih hna u sih law ral kan doh hna lai tiah ISIS pawl an au chin lengmang cang. Middle East lawng si loin Asia ram zong ah Islam ram kan dirh cang hna lai tiah an chim.
Asian ram pawl zong hi hnu kum zeimawzat in cun ISIS kut in an him ti lai lo tiah fiang tein an hmuh cang. Ref: CNN News.