President Trump le Palestinian hruaitu President Mahmoud Abbas pehtlaihnak a tha ko rua tiah an rak ruahmi cu rak tluan dawh a si lo. Bethlehem i tonnak an ngeih lioah 'na ka hlen' tiah President Trum nih a au hnawh tiah Israel TV nih a report.
Ramleng khualtlawn aa thawh hlanah Inn Raang ah Palestinian President Mahmoud Abbas nih a rak tlawn i Israel le Palestinian kong zong an ceih ti i, daihnak sernak kong zong an ceih. Asinain Israel a tlawn ah cun Trump lung a tling ti lo.
'Washington DC ah na ka hlen. Daihnak kongah kaa pumpe ko tiah na rak ka chimh. Asinain Israel nih an ka chimh tikah Israel dohnak ah forhfialtu pei na rak si ko hi. Israel huat ding in na mipi na forhfial lengmang hna' tiah Trump nih Abbas cu a cak leng tiah report nih a tial chih.
An meeting zong a linsa ngai. Abbas cu dai dup a thu, asinain caan zeimawzat hnuah an vun tluang than tiah report nih a tial than. President Trump he tonnak an ngeih lioah cun President Abbas zong daihnak a duh ngai bantukin a chim ko.
Israel le Palestinian karlak buainak hi zeitik ah dah a daih te lai timi an thei kho lo. US President kip nih an rak i zuam lengmangmi a si. Tutan ah President Trump nih lam kan sial cang. Daihnak kan ser hna lai tiah a hruai cang hna. Embassy thialnak zong a chim duh rih lo. Ref: TOI.