President Trump nih campaign a tuah lioah fak ngaiin a chimmi cu Jerusalem hi Israel zungzal khualipi a si tiah kan cohlan cang lai i, kan America embassy zong Tel Aviv in Jerusalem ah kan thial cang lai tiah a chim. Asinain atu tiang zeihmanh an cawlcang rih lo.
May 22 ah Israel ah President Trump a rak tlawmg lai i, zeitin dah a chim te hnga tiah an hngah lio a si. May 22-23 hi Israel nih Jersalem an rak lak kum 50 a tlin ni a si lai i, conglawmhnak zong an tuah pah lai. Hi ni theng te i Trump nih tlawn a timhmi hna cu sullam a ngei ko lai tiah an zumh.
A karlak ah Israel lei upa an siah US lei upa an siah an chimmi aa dang lengmang hna. Secretary of State Rex Tillerson nih zarhpini ah a chimmi cu 'Jerusalem thial kong hi tha tein kan zoh lio a si. Dainak a sertu maw a si lai buainak sertu dah a si lai timi kan zoh lengmang lio a si' a ti.
Inn Raang upa lei zong nih Jerusalem i US embassy thial ding cu a har ko lai. Middle East ah buainak kan ser tuk lai an ti. Muslim ram nih an doh tuk caah Trump biakamnak hi hlawhtlin dawh a si lo. US President kip nih tial ding in an rak chim nain caan a phak taktak tikah an let than lengmang.
Israel Prime Minister Netanyahu nih cun 'daihnak caah tihnung a si lai lo, cun kan thial ahcun a luan cia in tuanbia hmaan lo kan ngeihmi zungzal in a remh cang lai. Zeitik hmanh ah Jerusalem hi Palestinian khualipi a si bal lo' tiah Tillerson biachimmi a vun leh colh.
Jewish-American billionaire Casino Mogul Sheldon Adelson nih cun 'Tillerson biachim hi a hmaan lomi a si. 'Palestinian hi daihnak he hawikawm an si bal lo. Israel a kan halmi hi Israel nih hnatlak pi awk an tha lo' tiah a chim. Trump a rak dirkamhtu pakhat a si ve.
Israel Agriculture Minister Uri Ariel nih cun 'Trump nih kan thial lai a ti ko caah a bia a let lai lo. Mi kip nih an chimmi paoh kha leh lengmang an hau lo' tiah a chim. Tillerson biachim hi leh a hau lo tiah a chim duhnak a si. Trump nih zeihmanh fianternak a tuah rih lo caah amah kan hngah ko lai.
Midang chimmi hna kha cu Pathian bia a si ti phun in lakpiak ding an si lo' tiah a chim. Juerusalem hi Six Day War (1967) Israel nih an rak lakmi a si. Asinain International Community nih cun Israel ram ah an cohlang lo. Atu tiang Palestine he an i cuh. Ref: TOI.