Niruk le ningani ah fak tuk in ram 150 chung minung le company pawl cyber-attackers (computer thiam mifir) pawl nih an phomh hna. Company kip computer kip le pumpak computer kip kha a thli in an luh hnawh hna i an file an kharpiak hna.
Tangka nan kan pek lo ahcun nan file nan ong kho ti lai lo tiah tangka an hal hna. An phomhmi hna an zaa tein 200,000 leng an si. An tam taktak khi a si. Ahodah an si timi an thei kho colh hna lo nain atu cun North Korea cungah a tla cang. Cheukhat nih cun tangka in an file an tlanh manh leng cang hna.
Cyber security company Symantec Corp le Kaspersky nih an hlat lengmang tikah North Korea he aa tlaimi Lazarus Group an si kho men tiah an chim. Vawleicung ram 150 chung computer 200,000 hrawng an phomhpiak hna. Nikhatni zong ah tampi aa thei than te lai an ti.
March thla ah khan ram 31 an rak phomh cang hna. Symantec company nih an rak chimmi cu cyber mifir pawl hi North Korea Lazarus Group an si tiah a rak chim. Tutan an phomhnak 'ransomeware code' an zoh tikah Lazarus Group he an i lo tuk an ti.
Cyber mifir pawl nih 'ransomeware' timi an hman i midang computer file an lak i an kharpiak hna. An onpiak hna hlan chung poah cu a ngeitu zong nih an ong kho ti lo. Tangka an pek hna hnu lawng ah an onhter than khawh hna. Cheukhat nih cun Russian an zumh hna. Ref: The Express.