Zahan nirukni zing ah North Korea nih International Community le US zuamhteihnak in a missile a hneksak than. Report nih a chim ning ahcun Russia leiah a zuang i a rannak in lam tantin ah a letter than an ti. Mah ruangah a tlolhnak a si an ti.
Russian President Putin hrimhrim a lau tuk i a rannak in a ralkap zong ralrin tein um ding in a timh hna an ti. North Korea official zong missile an tlahmi kalnak lam a hman ti lo caah an thinphang tuk i a rannak in an missile cu an letter than i a tlolhnak tiang a phaknak kha a si an ti.
Report a tialtu cu Seoul Economy Daily si. A tial thanmi cu North Korea missile kalnak lam kha letter than hna hlah seh law Russia ramchung ah a tla lai a ti. Mah ruangah khan North Korea official nih a rannak in lam tantim a phak ah an puahternak a si a ti.
North Korea nih missile a hneksak tawn tikah 89-90 degree in nichuah leiah a kah tawn. Cuticun nichuah lei rili ah a tla tawn, asinain nirukni i a hneksakmi cu 49 degree in a zuanter tiah a tial chih.
Russia leiin Defence le Security chairman Victor Ozerov nih a chimmi cu 'nichuah leiah kan chiahmi hna ralkap le runvennak system hna cu ralring taktak in kan hloh colh hna tiah a chim. Russia nih North Korea zong a mawhchiat len lai tiah an zumh.
Russia nih North Korea cu a nau bantuk ah a ruahmi a si i, a runven lengmang. Fox news ah South Korea official nih an chimmi cu North Korea missile thlahmi hi KN 17 a si i, a laiva hrawng a si an ti. Atu zong nuclear kan hneksak than lai a ti, nain a ni le caan a chim rih lo. Ref: The Express.