North Korea hruaitu Kim Jong-un thah a timtu min cazin a chuah cang. American sungthoh CIA le South Korean sungthoh IS nih kan ram hruaitu Kim thah ding in timhnak an ngei tiah sual a puh hna. A rannak in nan kan pek hna lai an ti.
North Korean Central Public Prosecutors Office nih an chimmi cu 'kan hruaitu sang bik Kim thahnak caah bio-chemical hriamnam hman an i tim. Thah ding in timhnak khua a khangmi paoh cu an min cazin kan ngeih cang. Kan sinah a rannak in kan pe hna u. Dan kan tat hna lai' tiah an ti.
South Korea sungthoh hruaitu Lee Byong-ho zong hi an min cazin ah aa telmi ti a si, asinain a dang min cu an lang lo. Asinain Lee cu a riantuan caan aa lim deng cangmi a si. An chim thanmi cu 'US le South Korea nih nan tlaih hna lai i kan sinah nan kan pek hna lai' an ti.
Hi bantuk riantuan hi tapung le misual bawmh bantuk a si tiah a chim chih. South Korea lei sungthoh bu nih cun 'kan tlaih hna i kan peknak hna ding lam a um lo' an ti. North Korea nuclear kong an buai tuk lioah atu bantuk thil hi a chuakmi a si.
North Korea nih 'vutcam le mei ah kan ser hna lai' tiah a hrocer lengmang hna tikah US le S.Korea zong an timhnak an ngei chin lengmang. South Korea a siah US a siah missile runvennak timh cia tein an chiah hna. US le South korea zong an lungrethei timi theih khawh an si.
Missile zong atu le atu ti awk in an hneksak lengmang. An ralkap eksaisai tuah hrimhrim cu a caan zong a sau i an ropui kho tuk. Ref: The Express.