Saudia Arabia a khualtlawn cu a hlawhtling ngaingai. Zarhpini i a biachim hrimhrim a ropui i a tha kho tuk. A pakhatnak a chimmi cu kalsual tapung pawl hi hlo dih hna u tiah a forh hna. Tapung kan dohmi hna hi 'Nitlak ram le Islam kan i doh a si lo' tiah fiang tein a chim.
Thatnak le sualnak kan i doh a si a ti. Human rights thazaang pek chin lengmang a herhnak kong a chim. Arab ram ah human rights hi a thawnglo ngai; democracry leiah thazaang lak chin lengmang ding in a forhfial chih hna.
A chimmi ah a biapi tukmi cu 'kan ratmi hi nanmah cawnpiak ah a si lo; zeitin dah nan nun lai timi chimh awk ah kan ra lai lo; zeidah nan tuah awk a si timi chimh awk ah kan ra lo; ahodah nan si awk a si timi chimh awh ah kan ra lo; ahodah nan biak awk a si timi chimh awk ah kan ra lo' a ti.
'Atu kan ratmi cu hmailei ah thil tha kan hmuh chin lengmang khawhnak hnga thawng chin lengmang in hawikawmhnak ser ding in kan ra. Kan thatnak kan i hrawm hna lai i, kan phung le kan lam kan i upatpiak hna lai' tiah Trump nih a chim chih.
'Nan vawlei ah hin tapung nih hmunhma ngei hna hlah seh. Nan biakinn in thawl hna uh. Nan community in thawl hna uh' tiah fak ngaiin tapung dohnak kong a chim chih.
Nikhatni hi Israel ah a rak phan lai. Israel kong a chimmi a tlawm ngai tiah Israel lei cu thachiat pah dawh an si. Russian sinah thlithup information a pekmi kongah an thinhung tuk nain an zai duh ziar lo. A ing kan puanter sual lai an ti i, an kaa an i cip rih ko hna. Zeitluk in dah a lung kan ton lai timi lawng an ruat ve.
Trump nih a chimmi cu 'Abraham zumhnak pathum aa hrawmmi Judaism, Khrihfami le Islam nih kan kut kan i tlaih i kan um ti ahcun vawleicung ah daihnak a um ko lai. Israel le Palestinian telh chih in' tiah President Trump nih a chim. Israel kong tawite a chim.