Inn Raang leiin President Trump khuatlawnnak ding thawngpang an thanh cang. Suadia Arabia, Israe le Vatican a tlawng hna lai. National Day of Prayer pumhnak tuah lioah Trump nih a chimmi cu 'vawleicung Muslim hruaitu he Saudia Arabia ah tonnak kan ngei lai' a ti.
'Saudia Arabia kan thimnak ruang cu Islam biaknak hmun thiang pahnih a zohkhanhtu an si. Cu kaa hmun ahcun Muslim hruaitu he tonnak kan ngei lai i, tapung dohnak kong kan ceih lai. Muslim mino hna hmailei kong tiang ruahchannak kan ser lai a ti. Iran biacahnak zong aa tel chih lai an ti.
Saudia Arabia le Iran hi aa ral taktakmi an si. Trump nih a chim chihmi cu 'US kan rian cu midang kha zeitin dah nan nun lai timi chimh loin zeitin dah hawikawm kan ser lai i rian kan tuan ti lai timi hi a si. Middle East ah daihnak le himnak a umnak ding ah tapung kan doh lai i rian kan tuan ti lai a ti.
Saudia Arabia a tlawn khawh in Israel a tlawng than hna lai. President Obama zong a tlawn hmasami cu Saidia Arabia a si i, cun Egypt ah a rak tlawng. Israel cu a rak lanh tak hna. An lung a rak fak ngai. Asinain Trump nih cun Israel a tlawn cang hna lai.
May 22 -23 ah a rak tlawng hna lai. Israel nih Jerusalem an lak a kum 50 tlinnak an conglawmh lio a si caah President Trump nih Jerusalem ah US embassy thialnak kong zong a thanh chih men te lai tiah an zumh. Asinain Saudia Arabia a tlawnnak ah thial lo ding in an rah forh men te lai an ti.
Asinain President Trump nih a ceih pi dingmi hna cu Israel le Palestine buainak kong hi a si lai. Naite ah Palestinian hruaitu Abbas nih Inn Raang ah Trump zong a rak tlawn. Trump nih a ton than ve te lai. Hi ram pahnih daihnak le remnak hi Trumph nih aa hmaithlak cemmi a si lai.
Middle East a tlawn dih in Vatican zong a tlawng lai i, Pope Francis he tonnak an ngei lai. President Trump nih tlawn a tinhmi ram hna hi taksak lei zong in an biapi i thlarau lei zong in sullam a ngei. Islam, Judaism le Khrihfa biaknak pathum an si.
President Trump hi campaign a tuah lio in Pathian a duhnak le biaknak thisa ngei a sinak a langhter lengmang cang. US President tuanbia ah Pathian a duh cem le Khrifabu hruaitu he aa pehtlai cem a si lai tiah zumh a si.
President aa cuhnak in a tu tiang a nun ning le a khualtlawnnak ram hna he zoh chih tikah President Trump hi bochan tlak pacan dirhmun a tlai ko timi hmuh khawh a si. Ref: VOA News.