Russian Foreign Minister Sergei Larov le ambassador Sergey Kislyak nih President Trump cu Inn Raang ah an leng i biaruahnak an ngei. An i ton khawh tlawmpal ah hmanthlak kongah an buai i atu hi thil thar a chuak than. Trump caah a tihnung te ko lai.
Nikhatni ah Washington Post nih a tialmi cu 'Russian sinah President Trump nih thlthup taktakmi information (classified information) a pek hna' tiah a tial. President Trump nih zeidah a si timi a chim lo nain US sungthoh upa nih cun 'Russia nih cun kan thlithup information an theih cang lai' a ti.
Thlithup informationa (classified information) hi drone, satellite, sungthoh le ralkap nih nunnak pek le har taktak in an hlatmi a si i, lengah chuahter an duh lo. Lengah chuahter ding le chuahter lo dingmi information an ngei. Classified Information cu US nunnak le thihnak bantukin an ruahmi a si. Pi Clinton a tlaknak kha CI ruangah a si.
Tapung le ralm ramdang nih zeidah an tuahmi a si? Zeidah tuah an i tim tbk pawl kong hna kha thlithup in an hlat hna i an i chiahmi hna an si. Zeitin dah kanmah nih rian kan tuan ning a si lai? tiin thlithup taktak in information kha an thuh.
Kha bantuk thlithup information kha lengah a chuah i media le midang hna nih an phuan sual ahcun mi kip theih dih a si cang i, an hlatmi hna minung zong nih an rak theih cang i, a hlattu ca zong ah santlai lo ah a cang. Ramdang kong hna aa tel ahcun ramdang he huatnak le buainak a ser khomi a si.
Cucaah Trump nih thlithup information a pekmi hna cu a poi an ti kho tuk hna. 'A hmaan ko ahcun a poi taktak ko lai. Atu hi zeidah a cang timi tha tein kan hlat a hau' tiah Republican Senator Bob Corker nih a chim. Republican Senator Lindsey Graham nih 'a hmaan ko ahcun a buai tuk te ko lai' tiah a chim ve.
Senator John McCain nih cun 'lungrethei ngai a si, asinain fiang deuh in ka theih hlanah cun ka chim rih lai lo' a ti. Democratic Sen. Mark Warner nih cun 'kan sungthoh hna hmaiah bengh bantuk a si. Russian sinah kan thlithup informationa pek cu a tihnung tukmi a si' tiah a chim. US a buai ko cang. Ref: CNN News.