2010 in 2012 karlak ah Taluk nih American sungthoh CIA minung 20 poah cu a thah hna lo ahcun thong ah an thlak cang hna lai tiah zahan zarh zarhpini ah New York Times nih a tial. American sungthoh CIA caah thangchiatnak ngan pi pakhat a si.
An sungh-zatlaknak ngai pakhat zong a si. Taluk le Asia hrawnghrang ah American sungthoh cawlcangh a tluang ti lo ti fiang tein a lang cang. Leirawitu maw an um lai; an network dak an theihpiak hna lai. CIA chungkhar ah buainak nganpi a chuakmi pakhat a si.
New York Times nih a tialmi cu '2010 hnu in Taluk nih CIA cawlcanghnak a hrawh chin lengmang cang. A tlawm leiah minung 20 hi a thah hna lo ahcun thong ah a thlak hna lai' tiah a ti. Taluk hrawngah riantuanmi CIA minung tampi an tlau cang timi a fiang.
Min langhter a duh lomi American official pakhat nih a chimmi cu 'chan tampi chung rian kan tuan cang i tutan kan chunglei riantuannak a kan luh hnawhmi hi a fak cem a si' a ti. Zeitin dah Taluk nih a kan theih ning a si timi an thei kho rih lo. CIA chungin leirawitu maw an um; Taluk nih kan thlithup riantuannak kan onpiak caah dah a si an ti.
Minung pakhat cu a hawile hmai bak ah an rak kah. Taluk nih ralrinnak a kan pekmi a si tiah CIA nih an rak theih colh. 2010 in 2012 karlak ah CIA minung a tlaumi hi 20 hrawng an si. Kan caah sungh-zatlak takak a si tiah official pakhat nih a chim.
Russia le Taluk ah sungthoh riantuannak network ser hi a rak fawi ruam lo. An theih lengmang. Beijing i US embassy riantuantu zong Taluk nih an hlat lengmang hna tiah New York Times nih a tial. Obam cozah zong nih zeiruangah dah Taluk lei sungthoh riantuan hi a nuarh tuk an rak ti lengmang. Ref: TOI.