Nikhatni ah President Trump cu Israel a phan cang lai. Siangpahrang David khualipi Jerusalem le Western Wall (Jews mi thlacamnak tawn hmun Nitlak lei Vampang) ah President Trump a leng lai, asinain Netanyahu a siah Israel official upa nih Trump an zul lai lo tiah Inn Raang nih an chim.
Israel ram a si lo an ti diam. Jerusalem le Western Wall hi 1967 ah Jordan sinin Six Day War ah a rak lakmi a si. May 23 hi kum 50 a tlin camtuak zong lunglawm taktak in tuah an tim. Israel nih an rak lakmi a si ko nain International Community nih an pompiak duh hna lo.
Israel nih cun kan ram a si cang an ti. Nizan Prime Minister Netanyahu bia a chimnak ah a chimmi cu 'a luan cia kum 50 ah khan kan khualipi laicer ah kan rak kir, Jerusalem hi mi ram kan chuhmi hna a si lo; mi kut in kan luattermi kan ram a a si' tiah a chim.
'Kan ralkap le kan mipi hna ralthatnak thawng in mi kut ah a rak ummi kan ram kan luatter thanmi a si. Jerusalem le Western Wall cu zungzal kan khualipi a si lai' tiah a chim. Inn Raang leiin Jerusalem le Western Wall cu Israel ram a si lo tiah an chim hnuah Mr Netanyahu nih a chimmi a si.
Tutan Trump a tlawn hna ah hin official tein Jerusalem le Western Wall cu Israel ram a si cang tiah kan thanhpiak seh law US embassy zong kan thialpiak cang seh ti an duh. Hihi campaign a tuah lio hrimhrim in Trump nih aa kaam cangmi a si.
Asinain tlamtlinter than dawh a si lo. Inn Raang leiin an chimmi cu Trump nih embassy thialnak kong biachahnak a tuah rih lo an ti. Trump nih a pakhatnak ah daihnak kong cu ceih pi a timh hna. Israel le Palestinian hi daihnak nih a hrialnak hna caan a sau cang.
West Bank ah Israel nih inn a sak lengmangmi zong daihnak caah dawnkhantu a si. Na ngol chung rih a hau ko lai tiah Mr. Trump nih Mr. Netanyahu a rak chimh cang. Inn Raang lei biachim ning zoh tikah Israel caah thachiat ding a tam ngai. Muslim caah cun lunglawmhnak ngai a si lai.
Tutan Israel a tlawnnak ah Israel upa pakhat hman tel loin Jerusalem le Western Wall len aa timhmi cu Israel upa hna caah ingpuang ngai a si ko lai. A sullam cu Palestinian le Muslim ram hna mithmai an zoh ngai ko timi a lang. Caan nih biachim ko rih seh! Ref: TOI.