Jew miphun thlacamnak hmun, hmun thiang bik an timi Western Wall (Nitlak Lei Vampang) ah President Trump zong thla a cam. US President a tuan liomi ah Western Wall ah a phan hmasa cem le thlacam hmasa cem a si. WW hi Israel le Palestinian cuhmi Jerusalem hmun chungah ummi a si.
Jueruslam in nichuah lei pang paoh hi 1967 hlanah cun Jordan ramchung ah a rak ummi a si. Six Day War,1967 ah Israel nih Jordan in an rak lak than. Israel nih an lak cang ko nain official tein International Community nih an cohlanpiak lo. Palestinian nih kan khuapi ah kan ser te lai tiah an bawh lengmang ve.
Israel nih pek an duh ti hna lo. Kan tuanbia hrimhrim in kan khuapi zungzal a si an ti ve. Mah ruangah Jerusalem a siah Western Wall a siah ramkhel kong he aa tlaimi a si caah US President kip nih tonghpiak an duh hna lo. Jews miphun le Palestinian karlak ah theihthiam lonak le buainak kan ser sual lai an ti i, an phan bal lo.
Campaign an tuah kip ah cun Jerusalem ah embassy kan thial lai i, Jerusalem hi Israel khuapi ah kan cohlan cang lai tiah an rak chim lengmang ko nain a ni le caan a phak taktak tikah an kaa an i cip than lengmang. Trump zong aa chim sek len ve ko nain atu cun a kaa aa cip than ve cang. Trump hi US President lakah WW a phan hmasa cem a si.
Asinain Inn Raang leiin an chimmi cu 'ramkhel mit in a lenmi si loin thlarau mit tu in a lenmi a si' an ti. Trump nih a tlawn hna hlanah biahal a um lengmangmi cu 'WW hi Israel ram a si maw an ti i, Inn Rang lei nih an let duh hna lo. Embassy thialnak kong zong tutan ah ceih loin hmailei deuh ah ceih te ding in an chiah than.
Palestinian le Israel karlak ah buainak le huatnak a um lengmang tikah Palestinian zong State pek hna ahcun an dai ko lai an ti. State an pek hna ahcun Jerusalem hi an khuapi ah ser an timh. Asinain Israel nih an pe siang hna lai lo. Trump nih zeitin dah a ceih pi te hna lai. Trump cungah aa hngat cang. Ref: TOI.