Kim Jong-ung hawi basketball celh thiam Dennis Rodman cu nihnihni kha North Korea ah a rak phan cang. Rodman hi North Korea ah voili a phan cangmi a si. Kim Jong-un he zong tonnak an ngei lengmang cang. Basketball celhnak puai zong ah rem ngaiin an thu ti bal cang.
US le North Korea entainak a linhsat tuk lioah zeiruangah dah North Korea tlawn cu aa timh hnga an ti len. American minung pali zong North Korea cozah an hren ko rih hna. Rodman nih North Korea a tlawnnak kong fianternak a tuah lo.
US State Department zong nih North Korea tlawn a timhnak an theih. Asinain US ram aiawh in tlawn aa timhmi a si le si lo zong zeihmanh an chim lo.
2014 ah Rodman nih a basketball team cu Norht Korea a tlawn pi hna. North Korea hruaitu Kim Jong-un birthday lio conglawmhnak caah lentecelhnak puai an rak tuah. Kim Jongun hi basketball a uar ngaimi a si caah hawikawm ah an cang i a birthday lio zong ahcun conglawmhnak can ah tiah basketball celhnak an rak tuahpiak.
Dennis Rodman nih a chimmi cu 'Kim Jong-un hi mi tha a si. Kanmah bantuk cio a si ko. Capo le nih a zuammi a si. Kan ruah ning le kan tih ning bantuk minung a si lo. Mi tha tuk a si' tiah a thangthat len. 'A kikmi kuang chungah a pa ruak a chiahmi zong a ka hmuhter' tiah a chim chih. Ref: CNN News.