Nizan tihni i ISIS nih Iran an phomhmi cu khuaruahhar ngai zong a si. ISIS nih hnahnawhnak an pek bal lomi ruah lo piin an phomh hna cu an lau cio dih. A hleiin Iran ah a him biknak hmun pahnih an phomhmi hna hrim nih Iran a him lo timi a langhter cang.
President Trump nih a vun phomh colh hna. A pakhatnak ah harnak a tongmi hnemhnak a chim hmasa. 'ISIS kut in a thimi chungkhar caah thla kan cam i kan in tuar pi hna' tiah a chim. 'Tapung a bawmtu nih cun a tuh bantukin a zun ko lai' a ti than.
Iran hi vawleicung ram kip tapung bawmtu a si. Lebanon hmunkhur Hezbollah tapung a bawm lengmang tu zong a si. Tangka le hriamnam in an bawmh hna i Israel an dohter lengmang hna. 'Tapung an bawmh lengmang hna caah anmah cungah a tlung cang' tiah Trump nih a chim chih. Iran leiin lehrulnak a ra rih lo.
Trump hi Iran a doh zungzaltu a si. 2015 ah Iran nuclear hnatlaknak kan tuahmi zong ka hrawh than lai tiah campaign a tuah lioah a chim, asinain atu tiang cu a dai tein a zoh ko rih. Nizan nithumni ah khan US Senate nih dantat than ding in an timh.
Vawleicung ah tapung a bawmh lengmang ruangah dan kan tat than lai an ti. Russia zong US nih dantat than ding in an timh. US thimnak doh ding in Russia cozah nih cyber thiam pawl an hnatlak pi hna caah dan kan tat rih hna lai tiah timhnak an ngei fawn. Ref: TOI.