Russian Presiddent Putin hawi na si caah kan ram ah na lut kho ti lai lo tiah Ukraine cozah nih karate thiam minthang Steven Seagal cu 'black list' an pek. Ni kum ah Putin nih Russian miphun sinak zong a pek. Russian, American le Serbian miphun a si cang.
Putin hawi na si caah kan ram himnak caah ral na si cang. Cucaah kan ramchung ah kum nga chung cu na lut kho ti lai lo tiah Ukraine cozah a kham cang. Ukraine cozah nih Putin hawi si ruangah black list ah a chiahmi hna minung pahnih an si cang.
Pakhat cu French minta (actor) Gerard Depardieu a si i, atu hi minta Steven Seagal a si. 2014 ah Russia nih Ukraine in Crimea a lak hnu in an ram hnih karlak ah buainak a dong kho ti lo. Russia nih Crimea a lak lioah Seagal nih a chimmi cu 'a poinak a um hme maw!' a rak ti.
Ukraine Official nih an chimmi cu 'kan ramchung luh kan khamnak ruang cu kan ram caah tihnung le sunghnak a chuah pi sual khomi a si ti ruah chihnak he kan khammi a si' an ti.
Steven Seagal nih a chimmi cu 'black belt lawng si loin atu cun black list zong ka hmuh chih cang' tiah kum 65 nih Russian State News TASS ah a chim. Putin le Seagal he hawikawm tha ngai an si. Karate thiam veve an si. Judo zong an thiam veve.
Putin hi vawleicung ah hruaitu thawng cem pakhat ah aa telmi a si a ti. Putin zong nih a chimmi cu 'Seagal he kan i pehtlaihnak nih US le Russia karlak pehtlaihnak zong a thatter deuh lai tiah ka zumh' a ti. Russian miphun sinak passport zong amah pumpak in Steven cu a pek. Ref: The sun.