Vawlei cungah Taluk le Iran cozah tbk hna hi Khrihfami hna a hrem i, biaknak zalonnak a um lonak ram ngai an si. Asinain Taluk hi vawleicung ah Khrihfami hna an karh biknak ram a si. Iran Khrihfami hna zong cozah nih a hrem tuk bu hna in an karh chin lengmang tiah report a si.
Elam Ministires nih a reportmi cu hnabeidong le mah le mah thah aa timmi Iranian minung tam pi nih Jesuh Khrih cu a kan khamhtu a si tiah an cohlan i a zaza in tipilnak an ngeih chin lengmang a ti. Kan hnu zarh ah khan Afghan le Iran minung 200 leng nih tipilnak an ngei tiah a chim chih.
Report nih a chim ning ahcun a luan cia kum 20 hrawng ah khan Iran Khrihfami hna hi 2,000 - 5,000 karlak hrawng an si i, atu ahcun Iran ah Khrihfami hna hi 300,000 in 1 million karlak hrawng an um cang lai a ti.
South Asia ah International Christian Concern Reginal Manager William Stark nih a chimmi cu Iran ah Khrihfami zumhnak a thangcho chin lengmang a ti. Iran ah hin hremnak a tam tuk tikah lenglang in Khrihfami an zumhnak an phuang ngam lo nain zumtu thar an karh chin lengmnag tiah Iran Khrihfami hna sinin kan theih tiah William nih a chim chih.
Iran supreme leader Ayatollah nih a chimmi cu 'Khrihfami hna nih kan Islamic zumhnak le kan mino nan leirawi dih cang' tiah Khrihfami hna ralrinnak a pek hna. Kan ram security caah tihnung nan si ti tiang in an thihpheih hna. Khrihfami hna hi ramdang nih an dirkamhmi hna an si tiah sual zong an puh hna.
'Hi tluk in Khrihfami hremnak le dohnak a tam ko nain Khrihfabu a karh i a thawng chin lengmang' tiah William nih a chim. Kum thum le a cheu chung Iran thong ah an thlami Pastor Saeed Abdini nih a chimmi cu 'Iran mipi thangphawhnak a ra cuahmah lio' a ti. Iran mipi hi an hruaitu hna naak in chan thar nun an ngei deuh. American le Israel huatnak an ngeihmi zong a tlau chin lengmang cang' a chim chih. Ref: Christian Post.