Zarhpini zan le nikhatni zing ah Israel raltuknak vanlawng nih Golan Heights in thlanglei kam Syria ramchung hmunkhur ISIS tapung a kah hna tiah Israel ralkap upa nih pakhat nih a chim.
Israel le Syria ramri hrawngah hin ISIS he aa pehtlaimi tapung Khalid ibn al-Walid ralkap an um. Israel raltuknak vanlawng nih a kahnak hi UN inn thing a si i, IS tapung nih an umnak caah an hmanmi a si.
Israel caah a tihnung cawlcanghnak paoh cu kan zoh sawh hna lai lo tiah Israel ralkap upa pakhat nih a chim. A chim thanmi cu nizan kan kahmi cu 'motor a si i a cungah meithal ngan pi (machine gun) a ummi a si. Aa citmi minung pali an thi' tiah a chim chih.
Prime Minister Netanyahu nih a chimmi cu 'ISIS an siah zei bantuk hriamtlai hmanh an siah Syria ramchung buainak ruangah aa dor chungmi kan si an ti hmanh ah kan ramri ah umter kan duh lo' tiah a chim.
Kum tampi chungah Syria le Israel ramri karlak ah Khalid ibn al-Walid Army le Jabhat Fateh al-Sham hna hi an rak um ko, asinain Israel ralkap nih um ko hna seh an ti i, an zoh sawhsawh ko hna. Asinain tuan deuh ah khan Israel ralkap an bawh hna i an kah hna. Israel ralkap leiin hliam tongmi an um lo.
Cu hnu cun Israel raltuknak vanlawng nih a vun phomh colh hna. Israel nih policy an ngeihmi cu Syria leiin kan ramchung ah kuan a tlak ahcun Syria mawhphurhter a si lai ti a si. Cu tikah zei bu an siah Israel an kah hna ahcun Israel nih duh paoh in kan lehrul khawh hna timi phung an ngeih. Ref: TOI.