United States kip ah fak piin President Donald Trump duh lonak an langhtermi dongh hlei an tim lo. New York in Atlanta in Diego in a thongthong nih lam cungah sandah an piah hna.
Hmun tam deuh ahcun dai tein an piah nain Portland, Orengon ah cun an cian hna. Motor thlalang le dawr tbk an hrawhmi zong an um len ti a si. Sandah an piah duhnak ruang a tampi hna, asinain an duhmi aa khat pah cio hna. A tanglei bantukin an duhmi an langhter.
Dump Trump
Zeidah an chim duhmi a si? Campaign an tuah kaa hrawngah khan Republican party nih Donald Trump he pehtlaihnak ngeih lo kha an rak chim lengmangmi ruahnak (idea) khan 'Dump Trump' timi slogan hi an hmannak a si. Asinain atu cun Trump nih a tei cang.
Cheukhat nih Online Petition in Electoral College sinah ca an tial. Kan state nih poll ah vote an thlak bantuk khan December 19 ah hin Trump vote hlah hlah u an ti hna. "Clinton Caah Ruahchannak A Um Ti Maw?" tiin ka tialmi kha atu sandahpiahtu nih 'elector' sinah an halmi a si.
Asinain a si kho lai maw? A si kho lai timi an zum lo zeicatiah American tuanbia ah a um lomi a si caah Trump vote loin midang hna an vote hna ahcun America political tradition fak ngaiin a thlen lai tiah an zumh.
Clinton nih popular vote in a tei ko nain Electoral vote in Trump nih a tei caah President a tlinnak a si. Sandahpiahtu nih Electoral College zong an vun doh chih hoi.
Vampag Kham Loin Hlei Don Seh
Campaign a tuah chungah khan US-Mexico ramri hi ka vampang in ka kham lai a ti. Miami i sandahpiahtu hna nih cun vampang ser loin hlei dawn seh an ti.
A Biachimmi Let Than Hna Seh
Campaign a tuah chungah khan miphun thleidannak le huatnak le thennak lawng te a chim hna, cucaah a biachimmi let than hna seh. Trump nih 'sandahpiahtu hi tangka phalh in sandahpiahmi an si' tiah tweet ah aphomh ve hna, asinain ahnuah thangthatnak bia in hitihin a tial than:
"Zahan zan ah minung zeimawzat nih sandah an piah. Kan ram an dawt caah a si. Hmun khat ah kan ra ti hna lai i, kan ram kan ser than hna lai i kan liannganter than lai' a ti hna.
Ka President A Si Lo
Atlanta i sandahpiahtu nih 'Trump hi United States president si ding cun kan upat lo' an ti. Muslim a khammi President kan duh lo. Thlaihhrem a hmangmi president kan duh lo, lihchim a hmangmi president kan si duh lo an ti.