Israel hi democracy ram a si bantukin biaknak zalonnak tling an ngei dih. Judaism biaknak a siah Muslim biaknak a siah Khrihfami an siah zalong tein an biaknak an hmang hna. Asinain Muslim biaknak hi hna a hnok tuk an ti i, ahohmanh nih an celh hna lo.
An rem lonak hna le an celh lonak hna cu muslim biakinn (Mosques) kip ah loudspeaker an hmanmi hi a si. Muslim umnak sang le peng hrimhrim ahcun zingka le zanlei ah celh awk tha loin an au i, celh ding an rak si lo.
Israel zong ah an celh ti lo i upadi an serpiak an tim than hna. Prime Minister Netanyahu zong nih a hnatlak pi cang hna tiah theih a si. Netanyahu nih zarhpini ah a chimmi cu 'loudspeaker system thang tuk in hman ti lo ding in upadi an sermi cu ka hnatlak pi hna' a ti. Hi thil hi Europe ram le Muslim ram zeimawzat zong ah an tuah ciomi a si tiah a chim chap.
'Loudspeaker in thla an cam tikah communities dangdang cio zong nih an celh lo. Jews mi an siah Khrihfami an siah Muslim an siah an tuar tuk cang. Voi tam tuk keimah pumpak sinah kan celh ti lo, an au thawng a thang tuk an ti lengmang cang' tiah Prime Minister Netanyahu nih a chim.
Arab upadisertu hna nih cun 'Muslim kan biaknak zalonnak an nihsawh bia a si' an ti ve.
Ni fatin in a tuar cemmi hna cu Galilee, Negev, Jerusalem, TelAviv le Central Israel hi an si. Ni khat ah voi tam tuk hnahnawhnak a kan pek an si i, zingka le ih hnu zongah a kan pek an ti. Israel minung 20% hi Arab-Muslim kek an si. Ref: TOI.