United States of America President thim thar Donald Trump caah tuanvo a lianngan ngai. Vawleicung kong phisin ding tampi an um pinah Russia le US karlak ngiarnak tbk zong phisin a hau ve. Trump nih zeitin dah Russia kongah rian a tuan te lai?
Russia Cungah
Russia President Putin nih a ralkap sersiamnak caah tangka a hmanmi a karhter chin lengmang. Soviet Union chan bantukin Russia hi atu hi ralkap leiah kar a hlang chin lengmang. Raltuknak tank, raltuknak vanlawng le missile tbk caah a tangka (Rubles) tam tuk billion in a hman. Soviet Union unform an rak hmanmi hmanh kha a thar in an thlen cang.
Nuclear hriamnam ah a hmanmi tangka kong hi a buai ngaimi pakhat ah aa tel. Naite ah Russia nih a nuclear hriamnam thar a ser i NATO nih Satan 2 tiah an auhpiak. A hmual thawn hi meng 10 a kal kho i, US nichuah lei he thlanglei he a kah khawh lai an ti; France ram hi voikhat kahnak in a hrawh khawh dih lai tiah Russia nih an chim.
US an siah NATO an siah an lungtling lo lai. Economic dantatnak zong an khinh peng rih. Russia a sivang ngai. Ukrain in Creamia a lak hrawng hna kha cu an linsa takak. US le Russia karlak ah phisin dingmi tampi an um. Trump nih zeitindah a ruah te hnga timi hi an zoh ngaimi thil pakhat a si.
Kan hnu thla December ah khan Trump nih a chimmi cu 'a ram ah an upat i an thihzah ngaimi pa nih tha tuk in ka konglam a a chimmi cungah lunglawmhnak tampi ka ngei' tiah Putin nih a rak thangthatnak kha Trump nih a chim. A peh rihmi cu 'Russia he in tapung zong kan doh ti kho lai i, vawlei pi daihnak ca zong khua kan khang ti kho lai timi zumhnak ka ngei' a ti. 'Kan ram pahnih thathnemnak caah riantuan ding dangdang zong an um' tiah a peh rih.
A biachim ning cun Russia - Russia pehtlaihnak sersiam zong ah a cang kho te lai or a hlannak in a zual lei i US tumchuktertu dak a si te lai.